वॉशिंग्टन, 11 सप्टेंबर (हिं.स.) । नेपाळ-चीन सीमा क्षेत्रात आलेल्या भीषण आपत्तीनंतर सुमारे ७० अमेरिकन नागरिक अद्याप बेपत्ता आहेत. अमेरिकेच्या परराष्ट्र विभागाने सांगितले की, या आपत्तीमध्ये रस्ते आणि पूल उद्ध्वस्त झाले असून अनेक संपूर्ण गावेही मलब्याखाली गाडली गेली आहेत. परराष्ट्र विभागाच्या माहितीनुसार, गुरुवारी दुपारपर्यंत १८ अमेरिकन नागरिकांना सुरक्षित ठिकाणी पोहोचवण्यात आले होते. प्रभावित भागात असलेल्या अमेरिकन नागरिकांची सुरक्षा ही अमेरिकेच्या परराष्ट्र विभागाची सर्वोच्च प्राथमिकता असल्याचे सांगण्यात आले.

अमेरिकेच्या परराष्ट्र विभागाच्या एका प्रवक्त्याने सांगितले की, काठमांडूमध्ये असलेल्या अमेरिकी पथकाने नेपाळमध्ये पोहोचलेल्या सर्व प्रभावित कुटुंबांची भेट घेतली आहे. तसेच, वॉशिंग्टनमध्ये तैनात अधिकारी अमेरिकेत असलेल्या कुटुंबीयांच्या सातत्याने संपर्कात आहेत.प्रवक्त्याने सांगितले की, मदत आणि बचाव पथकांसाठी परिस्थिती अत्यंत आव्हानात्मक आहे. आपत्तीमध्ये रस्ते, पूल आणि संपूर्ण गावे उद्ध्वस्त झाली आहेत. अनेक ठिकाणांचा भौगोलिक नकाशाच बदलला आहे. काही भागांमध्ये पूर्वी जिथे लोक राहत होते, तिथे आता अनेक फूट उंचीपर्यंत माती आणि दगडांचा ढिगारा साचला आहे.

आपत्तीमुळे हेलिकॉप्टरच्या माध्यमातून सुरू असलेल्या मदत आणि बचाव मोहिमेलाही अडथळे येत आहेत. वैमानिकांना अरुंद दऱ्यांमधून उड्डाण करावे लागत आहे. अनेक ठिकाणी रस्ते तसेच नद्यांच्या काठावरील जुने मार्गदर्शक चिन्हेदेखील नष्ट झाली आहेत. उंचावरील भागात हवेचा दाब कमी असल्यामुळे बचावकार्य अत्यंत धोकादायक बनले आहे. काही ठिकाणी तर बचाव मोहीम राबवणेही शक्य होत नाही.

अमेरिकेच्या परराष्ट्र विभागाच्या माहितीनुसार, आपत्तीच्या पहिल्याच दिवशी अमेरिकेने नेपाळला शोध आणि बचाव मोहिमेत मदत करण्याची तयारी दर्शवली होती. मात्र, नेपाळ सरकारने सुरुवातीला ही मदत स्वीकारली नाही. नेपाळने आपल्या यंत्रणा बचावकार्य हाताळण्यास सक्षम असल्याचे म्हटले होते. त्यानंतर आंतरराष्ट्रीय दबावाच्या पार्श्वभूमीवर नेपाळने काही परदेशी पथकांना विशेष बचावकार्यांसाठी देशात येण्याची परवानगी दिली. या पथकांनी विशेषतः जलविद्युत प्रकल्पांच्या बोगद्यांमध्ये बचावकार्य करण्यासाठी मदत केली.

अमेरिकेच्या परराष्ट्र विभागाने सांगितले की, या आपत्तीचा परिणाम अत्यंत मोठ्या भूभागावर झाला आहे. सुमारे ५,१०० लोक अद्याप बेपत्ता असल्याचे सांगण्यात येत आहे. बदलत्या परिस्थितीत मदत आणि बचावकार्य वेगाने सुरू आहे. अमेरिकी अधिकारी जमिनीवर स्थानिक यंत्रणांसोबत समन्वय साधून काम करत असून परिस्थितीनुसार आपल्या मोहिमेत आवश्यक बदल करत आहेत.

दरम्यान, नेपाळमध्ये आलेल्या पुरामुळे प्रभावित झालेल्या नागरिकांच्या स्मरणार्थ व्हर्जिनियातील साउथ रायडिंग येथे मेणबत्ती प्रज्वलित करून श्रद्धांजली सभा आयोजित करण्यात आली. या सभेला स्थानिक समुदायातील सदस्य तसेच पुरातील पीडितांच्या कुटुंबीयांनी उपस्थिती लावली. या शोकसभेत काँग्रेस सदस्य सुहास सुब्रमण्यम यांनीही प्रभावित कुटुंबीयांसोबत सहभागी होत श्रद्धांजली अर्पण केली.

---------------

हिंदुस्थान समाचार / Priyanka Bansode