काठमांडू, 11 सप्टेंबर (हिं.स.)। नेपाळच्या मंत्रिमंडळाने पंतप्रधान बालेंद्र शाह यांच्या या महिन्याच्या अखेरीस होणाऱ्या संयुक्त राष्ट्र महासभेच्या अधिवेशनातील सहभागाला मंजुरी दिली आहे. नुकत्याच आलेल्या भीषण आकस्मिक पुराच्या पार्श्वभूमीवर शाह या पुरामुळे झालेल्या नुकसानीसह हवामान बदलाच्या परिणामांवर भाष्य करण्याची शक्यता आहे. शाह २२ ते २६ सप्टेंबर दरम्यान न्यूयॉर्क येथे होणाऱ्या संयुक्त राष्ट्र महासभेच्या (यूएनजीए) ८१व्या अधिवेशनासाठी नेपाळच्या प्रतिनिधीमंडळाचे नेतृत्व करतील. गुरुवारी मंत्रिपरिषदेने मंजुरी दिल्यानंतर होणारा हा दौरा मार्चमध्ये पदभार स्वीकारल्यानंतरचा शाह यांचा पहिलाच परदेश दौरा असेल.

संयुक्त राष्ट्रांच्या अधिकृत भाषण कार्यक्रमानुसार, शाह २४ सप्टेंबर रोजी संयुक्त राष्ट्र महासभेच्या अधिवेशनाला संबोधित करणार आहेत. आपल्या भाषणात ते हवामान बदलाच्या मुद्द्यावर भाष्य करण्यासोबतच २६ ऑगस्ट रोजी आलेल्या भीषण भोटेकोशी आकस्मिक पुराचा हवामान बदलाशी संबंध जोडण्याची शक्यता आहे. नेपाळ-तिबेट सीमेच्या जवळ हिमस्खलनामुळे आलेल्या या आकस्मिक पुरामुळे उत्तर आणि मध्य नेपाळमधील अनेक शहरे व गावे उद्ध्वस्त झाली. या दुर्घटनेत १,३०० हून अधिक जणांचा मृत्यू झाला असून ५,००० हून अधिक जण अद्याप बेपत्ता आहेत. या आपत्तीमुळे देशातील मालमत्ता आणि पायाभूत सुविधांचेही मोठ्या प्रमाणात नुकसान झाले आहे.

संयुक्त राष्ट्र महासभेचे ८१वे अधिवेशन ८ सप्टेंबर रोजी सुरू झाले आहे. या अधिवेशनात जगभरातील नेते २२ ते २८ सप्टेंबरदरम्यान होणाऱ्या सर्वसाधारण चर्चासत्रात १९३ सदस्य असलेल्या या संघटनेला संबोधित करतील.दरम्यान, राज्य सरकारने शुक्रवारी जारी केलेल्या निवेदनानुसार, २६ ऑगस्ट रोजी नेपाळमध्ये आलेल्या आकस्मिक पुरानंतर तेथे अडकलेले सिक्कीममधील आठ नागरिक सुरक्षितपणे मायदेशी परतले आहेत. राज्य सरकारच्या ‘नेपाळ फ्लॅश फ्लड टास्क फोर्स’ने दिलेल्या माहितीनुसार, गंगटोक आणि ग्यालशिंग जिल्ह्यांतील हे यात्रेकरू कैलास मानसरोवर यात्रेसाठी गेले होते. नेपाळमध्ये आलेल्या आकस्मिक पुराच्या वेळी ते तिबेट स्वायत्त प्रदेशातील सागा काउंटी येथे अडकले होते.

पुरामुळे मृत्युमुखी पडलेल्यांची संख्या वाढून १,३८५ वर पोहोचली आहे. तर ५,००० हून अधिक बेपत्ता नागरिकांचा शोध आणि बचावकार्य अद्याप सुरू आहे. आतापर्यंत विविध भागांतून १३,६७६ जणांना सुरक्षित बाहेर काढण्यात आले आहे.दरम्यान, वृत्तानुसार, पुरानंतर चीनमध्ये अडकलेले किमान ७०३ नेपाळी नागरिक सिंधुपालचोक येथील तातोपानी सीमा मार्गे मायदेशी परतले आहेत. चिनी माध्यमांच्या वृत्तानुसार, या आपत्तीमध्ये चीनच्या बाजूलाही किमान ४३ जणांचा मृत्यू झाला असून तिबेटमध्ये ५०० हून अधिक जण अद्याप बेपत्ता आहेत.

---------------

हिंदुस्थान समाचार / Priyanka Bansode