वॉशिंग्टन , 11 सप्टेंबर (हिं.स.)। अमेरिकेचे राष्ट्राध्यक्ष डोनाल्ड ट्रम्प यांच्या रिपब्लिकन मिडटर्म परिषदेच्या दुसऱ्या दिवशी, गुरुवारी रिपब्लिकन नेते आणि समर्थकांनी ‘टर्निंग पॉइंट यूएसए’चे संस्थापक चार्ली किर्क यांना भावपूर्ण श्रद्धांजली वाहिली. यावेळी संपूर्ण सभागृह ‘चार्ली, चार्ली’च्या घोषणांनी दुमदुमून गेले.

चार्ली किर्क यांची एका वर्षापूर्वी हत्या करण्यात आली होती. डलासमधील बास्केटबॉल स्टेडियममध्ये जमलेली गर्दी त्यावेळी पूर्णपणे शांत झाली, जेव्हा किर्क यांच्या सन्मानार्थ पाच मिनिटांचा स्मृतिपट दाखवण्यात आला. या व्हिडिओमुळे काही काळ परिषदेला असलेले राजकीय वातावरण पूर्णपणे भावुक झाले. ‘ट्रम्प वॉर रूम’ या ट्रुथ सोशल हँडलवर चार्ली किर्क यांना ‘महान’ संबोधण्यात आले. राष्ट्राध्यक्ष ट्रम्प यांनी हा संदेश आणि व्हिडिओ रिपोस्ट केला.

यावेळी ‘टर्निंग पॉइंट’चे उपाध्यक्ष आणि पाद्री लुकास माइल्स यांनी सांगितले की, चार्ली किर्क यांच्या निधनाला एक वर्ष उलटले असले तरी त्यांचा आवाज आजही कमजोर झालेला नाही. गेल्या एका वर्षात संघटनेचे सदस्य आणि सोशल मीडियावरील त्यांच्या समर्थकांची संख्या अनेक पटींनी वाढली आहे, असे त्यांनी सांगितले.माइल्स यांनी परिषदेत म्हटले, “टर्निंग पॉइंट संपलेले नाही. चार्ली यांनी ज्या संस्थेची पायाभरणी केली, ती सातत्याने वाढत आहे आणि आता एक नवी पिढी पुढे येत आहे.”

चार्ली किर्क हे अमेरिकेतील उजव्या विचारसरणीच्या राजकारणातील अत्यंत प्रभावशाली व्यक्तिमत्त्व होते. त्यांनी महाविद्यालयीन परिसरांमध्ये तरुणांचे मोठे नेटवर्क उभे केले होते. तसेच ते लोकप्रिय पॉडकास्ट चालवत होते आणि तरुण पुराणमतवादी ख्रिश्चनांमध्ये त्यांचा मोठा प्रभाव होता.डोनाल्ड ट्रम्प यांच्या ‘मेक अमेरिका ग्रेट अगेन’ (मागा) मोहिमेतील विविध गटांना एकत्र ठेवण्यातही किर्क यांची महत्त्वाची भूमिका होती.

चार्ली किर्क यांची १० सप्टेंबर २०२५ रोजी यूटा व्हॅली विद्यापीठाच्या कॅम्पसमध्ये हत्या करण्यात आली होती. ते त्यावेळी विद्यार्थ्यांना संबोधित करत होते. या प्रकरणात २३ वर्षीय टायलर रॉबिन्सनवर हत्येचा गंभीर आरोप आहे. दोष सिद्ध झाल्यास त्याला मृत्युदंडाची शिक्षा होऊ शकते. घटनेनंतर दुसऱ्याच दिवशी त्याने आत्मसमर्पण केले होते. मात्र, न्यायालयात त्याने स्वतःला निर्दोष असल्याचे सांगितले आहे.

किर्क यांच्या निधनानंतर संघटनेत अंतर्गत मतभेदही पाहायला मिळाले आहेत. प्रसिद्ध पॉडकास्टर कँडिस ओवेन्स यांच्यासह अनेकांनी सरकारी वकिलांच्या या दाव्यावर प्रश्न उपस्थित केले आहेत की, या हत्येमागे केवळ रॉबिन्सनच सहभागी होता. या प्रकरणाबाबत इंटरनेटवरही विविध प्रकारचे दावे केले जात आहेत.

आता चार्ली किर्क यांच्या पत्नी एरिका किर्क यांची ‘टर्निंग पॉइंट’च्या नव्या मुख्य कार्यकारी अधिकारी (सीईओ) म्हणून नियुक्ती करण्यात आली आहे. त्या आता संघटनेच्या सार्वजनिक कार्यक्रमांमध्ये भाषणे देण्याची जबाबदारी सांभाळत आहेत. तसेच वादविवादाचे कार्यक्रम सुरू ठेवण्यासाठी इतर विश्लेषकांनाही व्यासपीठ उपलब्ध करून दिले जात आहे. संघटनेने यूटा येथील ओरेममधील त्या विद्यापीठाच्या कॅम्पसमध्येही शोकसभा आयोजित केली, जिथे चार्ली किर्क यांची हत्या झाली होती.संघटनेने आपल्या निवेदनात म्हटले की, चार्ली किर्क यांची उणीव आजही प्रकर्षाने जाणवत आहे.

---------------

हिंदुस्थान समाचार / Priyanka Bansode