वॉशिंग्टन , 11 सप्टेंबर (हिं.स.)।अमेरिका आणि पश्चिम आशियाच्या राजकारणाशी संबंधित एक मोठी बातमी समोर आली आहे. वृत्तानुसार, अमेरिकेचे राष्ट्राध्यक्ष डोनाल्ड ट्रम्प यांनी सौदी अरेबियाचे क्राउन प्रिन्स मोहम्मद बिन सलमान यांचा फोन दोन वेळा स्वीकारला नाही. अहवालानुसार, सौदी प्रिन्स यांना अमेरिकेने हुती बंडखोरांविरोधात थेट हवाई हल्ले करावेत, अशी इच्छा होती. मात्र, ट्रम्प यांनी सध्या अशी कारवाई करण्यास स्पष्ट नकार दिला आहे.

येमेनमधील इराणसमर्थित हुती बंडखोरांनी सामरिकदृष्ट्या अत्यंत महत्त्वाच्या लाल समुद्रातील मोखा या बंदर शहरावर ताबा मिळवला आहे. यानंतर ते हनीश बेटांच्या दिशेने आगेकूच करत आहेत. त्यामुळे जगातील सर्वाधिक व्यस्त सागरी मार्गांपैकी एक असलेल्या ‘बाब अल-मंदेब सामुद्रधुनी’समोर मोठा धोका निर्माण झाला आहे. मोखा शहर या सामुद्रधुनीपासून अवघ्या ८० किलोमीटर अंतरावर आहे. या मार्गातून जगातील सुमारे १२ टक्के व्यापार आणि मालवाहतूक होते.

हुती बंडखोरांच्या वाढत्या आगेकुचीमुळे सौदी समर्थित येमेन सरकारच्या सैन्याला माघार घेण्यास भाग पडले आहे. हे असे समजून घेता येईल की, येमेनमधील मोखा शहरात हुती सैन्य वेगाने पुढे सरकत असताना आणि सौदी समर्थित येमेनचे सैन्य माघार घेत असताना परिस्थितीचे गांभीर्य लक्षात घेऊन क्राउन प्रिन्स मोहम्मद बिन सलमान यांनी अमेरिकेचे राष्ट्राध्यक्ष डोनाल्ड ट्रम्प यांना फोन केला. माहितीनुसार, एमबीएस यांनी गुरुवारी पहिल्यांदा फोन करून बिघडलेल्या परिस्थितीची माहिती ट्रम्प यांना दिली. त्यानंतर काही तासांनी प्रिन्स यांनी पुन्हा फोन केला आणि अमेरिकेने थेट हुती बंडखोरांविरोधात लष्करी हल्ले करावेत, अशी मागणी ट्रम्प यांच्याकडे केली. येमेनमध्ये वाढत असलेल्या संघर्षाबाबत ट्रम्प यांनी चिंता व्यक्त केली; मात्र, सध्या हुती बंडखोरांविरोधात अमेरिकेचे हल्ले सुरू करण्यास त्यांनी नकार दिला आहे.

अमेरिकी अधिकाऱ्यांच्या हवाल्याने आलेल्या वृत्तानुसार, राष्ट्राध्यक्ष ट्रम्प यांनी सौदी प्रिन्सची थेट लष्करी हस्तक्षेपाची मागणी फेटाळून लावली. यामागे अमेरिकेची विचारपूर्वक आखलेली रणनीती असल्याचे मानले जात आहे. सध्या येमेनमधील संघर्षात अमेरिकेने थेट उतरू नये, अशी अमेरिकेची भूमिका असल्याचे यावरून स्पष्ट होते.दरम्यान, एका वरिष्ठ अमेरिकी अधिकाऱ्याने सांगितले की, लाल समुद्रातील नौवहनाचे स्वातंत्र्य सुरक्षित ठेवणे आणि अमेरिकेच्या राष्ट्रीय हितांचे रक्षण करणे ही अमेरिकेची पहिली आणि एकमेव प्राथमिकता आहे.

अमेरिकेची इच्छा आहे की, अशा प्रकारच्या प्रादेशिक सुरक्षा आव्हानांना सामोरे जाण्यासाठी स्थानिक आणि प्रादेशिक भागीदार देशांनी स्वतः पुढे येऊन परिस्थितीची जबाबदारी स्वीकारावी. मात्र, अमेरिका सौदी अरेबियाला हुती बंडखोरांविरोधात गुप्तचर माहिती आणि लक्ष्य निश्चित करण्यासाठी आवश्यक माहिती उपलब्ध करून देणार आहे.

---------------

हिंदुस्थान समाचार / Priyanka Bansode