मुंबई, 12 सप्टेंबर (हिं.स.)।
'हनुमान अंश'चे बॉक्स ऑफिसवरील वर्चस्व कायम आहे. या चित्रपटाचा दबदबा असतानाच, अक्षय कुमार आणि सैफ अली खान यांची मुख्य भूमिका असलेला 'हैवान' हा नवीन चित्रपट प्रेक्षकांना चित्रपटगृहांकडे आकर्षित करण्यात अपयशी ठरला. सैफ-अक्षय जोडीला पुन्हा एकत्र आणणाऱ्या या चित्रपटाची पहिल्या दिवसाची कामगिरी अत्यंत निराशाजनक राहिली. 'सॅकनिल्क'च्या (Sacnilk) सुरुवातीच्या आकडेवारीनुसार, देशभरात सुमारे ७,२२४ शोज असूनही 'हैवान'ने पहिल्या दिवशी केवळ ३ कोटी रुपयांची कमाई केली.
दुसरीकडे, 'हनुमान अंश'च्या कमाईचा वेग कायम आहे. प्रदर्शनाच्या ३६ व्या दिवशीही या चित्रपटाने ५,७४३ शोजद्वारे अंदाजे १०.५० कोटी रुपयांची कमाई केली. यामुळे चित्रपटाचे एकूण देशांतर्गत संकलन १७३.६३ कोटी रुपयांवर पोहोचले आहे. लेखक-दिग्दर्शक डॉ. विशाल चतुर्वेदी यांच्या पुस्तकावर आधारित या चित्रपटात शोभिनव सत्या मुख्य भूमिकेत आहे. हा चित्रपट नीम करोली बाबा यांच्या जीवनावर आधारित असून बॉक्स ऑफिसवर आपली मजबूत पकड कायम राखून आहे.
त्याचबरोबर, पंकज त्रिपाठी, अली फजल आणि दिव्येंदू यांची भूमिका असलेला 'मिर्झापूर द मूव्ही' देखील बॉक्स ऑफिसवर दमदार कामगिरी करत आहे. या चित्रपटाने पहिल्या आठवड्यात १४८.४५ कोटी रुपयांची कमाई केली. आठव्या दिवशी (दुसऱ्या शुक्रवारी) कमाईत थोडी घट होऊनही, चित्रपटाने अंदाजे ९ कोटी रुपयांचे संकलन केले. परिणामी, 'मिर्झापूर द मूव्ही'चे एकूण देशांतर्गत संकलन १५७.४५ कोटी रुपयांपर्यंत वाढले आहे.
---------------
हिंदुस्थान समाचार / हर्षदा गावकर
