न्यूयॉर्क, 13 सप्टेंबर (हिं.स.) | अमेरिकन ओपनच्या अंतिम सामन्यात सलग तिसऱ्यांदा चॅम्पियन बनण्याचे स्वप्न भंगल्यानंतर आर्यना सबालेन्काला कोर्टवर आपल्या भावनांवर नियंत्रण ठेवणे कठीण झाले. बेलारूसच्या या टेनिसपटूला एलेना रायबाकिनाने एका रोमांचक सामन्यात ६-४, ५-७, ६-२ ने पराभूत करून विजेतेपद पटकावले. सामन्याचा शेवटचा गुण संपताच सबालेन्काची निराशा आणि राग स्पष्टपणे दिसत होता. तिने जोरात आपली रॅकेट आपटली. यानंतर, जेव्हा एक कॅमेरामन तिच्या भावना कॅमेऱ्यात कैद करण्याचा प्रयत्न करत होता, तेव्हा सबालेन्का त्याच्यावर ओरडतानाही दिसली.

हा पराभव सबालेन्कासाठी अधिकच कटू होता, कारण तिने सलग तिसरे अमेरिकन ओपन महिला एकेरीचे विजेतेपद जिंकण्याच्या उद्देशाने या स्पर्धेत प्रवेश केला होता. मागील दोन स्पर्धा जिंकल्यानंतर, सबालेन्का यावेळी अंतिम फेरीत पोहोचली होती, पण रायबाकिनाने शेवटच्या टप्प्यावर तिचा प्रवास थांबवला.

अंतिम सामन्यात, सबालेन्काने चांगली सुरुवात केली, पण रायबाकिनाने पहिला सेट ६-४ ने जिंकला. सबालेन्काने दुसऱ्या सेटमध्ये पुनरागमन करत ७-५ ने विजय मिळवला आणि सामना निर्णायक सेटपर्यंत नेला. रायबाकिनाने तिसऱ्या सेटमध्ये ६-२ ने विजय मिळवून आपले पहिले अमेरिकन ओपन विजेतेपद पटकावले.

अंतिम सामन्यातील पराभवाचा परिणाम केवळ ट्रॉफीपुरता मर्यादित नव्हता. सबालेन्काने आपले जागतिक क्रमवारीत अव्वल स्थानही गमावले. तिने महिला टेनिसमध्ये ९९ आठवडे अव्वल स्थान राखले होते. सामन्यानंतर तिची निराशा स्वाभाविक होती. रॅकेट फेकल्यानंतर एका कॅमेरामॅनवर आलेल्या तिच्या रागाने तिचा संताप आणखी वाढला. पण, त्यानंतर माध्यमांशी झालेल्या संवादात सबालेन्काने हा पराभव सकारात्मकतेने घेतला.

सबालेन्का म्हणाली की, स्पर्धेतील तिच्या कामगिरीतून अनेक सकारात्मक गोष्टी घेण्यासारख्या आहेत. ती म्हणाली, मला वाटते की, मी दाखवलेल्या कामगिरीच्या पातळीवर मी एकंदरीत आनंदी असायला हवे. या स्पर्धेतून खूप काही शिकण्यासारखे आहे. ती पुढे म्हणाली, अनुभवाने हे सिद्ध होते की, मी नेहमीच अधिक मजबूत होऊन परत येते. या सीझनमधून मिळालेल्या सर्व शिकवणींनी मला आधीच अधिक कणखर बनवले आहे आणि पुढच्या वर्षी आणखी चांगली कामगिरी करण्यासाठी ते मला नक्कीच प्रेरित करेल.

---------------

हिंदुस्थान समाचार / वृषाली देशपांडे