नवी दिल्ली, 13 सप्टेंबर (हिं.स.) । ऑस्ट्रेलियाविरुद्धच्या एकदिवसीय मालिकेपूर्वी दक्षिण आफ्रिकेला मोठा धक्का बसला आहे. वेगवान गोलंदाज ऑटनील बार्टमन डाव्या हॅमस्ट्रिंगच्या दुखापतीमुळे २४ सप्टेंबरपासून डर्बनमध्ये सुरू होणाऱ्या तीन सामन्यांच्या एकदिवसीय मालिकेतून बाहेर झाला आहे. क्रिकेट दक्षिण आफ्रिकेने जाहीर केले की, त्याच्या जागी डुआन जॅनसेनची निवड करण्यात आली आहे. तो १९ सप्टेंबर रोजी डर्बनमध्ये संघात आणि त्याचा भाऊ मार्कोसोबत सामील होईल.

मालिकेतून बाहेर होणारा बार्टमन हा दुसरा क्रिकेटपटू आहे. यापूर्वी, हॅमस्ट्रिंगच्या दुखापतीमुळे कागिसो रबाडा देखील एकदिवसीय मालिकेतून बाहेर झाला होता. तथापि, रबाडाच्या कसोटी मालिकेतील सहभागाबाबत अद्याप निर्णय झालेला नाही. दक्षिण आफ्रिकेने गेल्या आठवड्यात ऑस्ट्रेलियाविरुद्धच्या तीन सामन्यांच्या एकदिवसीय मालिकेसाठी १६ सदस्यीय संघाची घोषणा केली होती, ज्याचे कर्णधारपद टेंबा बावुमाकडे आहे. या संघात डेव्हिड मिलर आणि यष्टीरक्षक-फलंदाज क्विंटन डी कॉक यांचाही समावेश आहे.

२०२३ च्या एकदिवसीय विश्वचषकात शेवटचा खेळलेला गेराल्ड कोएत्झी देखील संघात परतला आहे. तो रबाडाची जागा घेईल. मात्र, दक्षिण आफ्रिकेच्या संघातील कोणत्याही खेळाडूसाठी रबाडाची जागा भरणे हे एक कठीण काम असेल. दरम्यान, नामिबियाविरुद्धच्या टी-२० मालिकेत नुकतीच उत्कृष्ट कामगिरी करणारा स्फोटक मधल्या फळीतील फलंदाज डेवाल्ड ब्रेविस संघात नाही. तो प्रथम-श्रेणी क्रिकेट खेळून कसोटी हंगामाची तयारी करेल आणि एडन मार्कराम दुसऱ्या व तिसऱ्या एकदिवसीय सामन्यांसाठी उपलब्ध असेल.

---------------

हिंदुस्थान समाचार / वृषाली देशपांडे