मुंबई, 14 सप्टेंबर (हिं.स.)। दक्षिण भारतीय अभिनेत्री नयनतारा यांच्या बहुप्रतीक्षित ‘महाशक्ती’ चित्रपटाचा टीझर जारी करण्यात आला आहे. सुंदर सी. यांच्या दिग्दर्शनाखाली तयार झालेल्या या चित्रपटात नयनतारा पुन्हा एकदा लोकप्रिय ‘मूकुथी अम्मन’ या भूमिकेत दिसणार आहे. २०२० मध्ये प्रदर्शित झालेल्या ‘मूकुथी अम्मन’ चित्रपटातील तिच्या या भूमिकेला प्रेक्षकांनी मोठी पसंती दिली होती. आता या भूमिकेचे पुनरागमन झाल्याने चित्रपटाबाबत प्रेक्षकांची उत्सुकता आणखी वाढली आहे. टीझरमध्ये भव्य दृश्ये, मोठ्या प्रमाणावर उभारण्यात आलेले सेट आणि रहस्याने भरलेले वातावरण पाहायला मिळते.

‘महाशक्ती’ चित्रपटाची निर्मिती डॉ. ईश्वरी के. गणेश यांनी वेल्स फिल्म इंटरनॅशनलच्या बॅनरखाली अवनी मीडिया, आयव्हीवाय एंटरटेनमेंट आणि राउडी पिक्चर्स यांच्या सहकार्याने केली आहे. या चित्रपटात नयनतारा हिच्यासह रेगिना कॅसांद्रा, योगी बाबू आणि ऊर्वशी यांच्यासह अनेक कलाकार महत्त्वाच्या भूमिकांमध्ये दिसणार आहेत. टीझरमध्ये नयनतारा यांचे दमदार आणि यापूर्वीपेक्षा वेगळे रूप पाहायला मिळते. दिग्दर्शक सुंदर सी. यांनी यावेळी ‘मूकुथी अम्मन’ची दुनिया मोठ्या स्तरावर सादर करण्याचा प्रयत्न केला आहे.

हा चित्रपट नोव्हेंबर २०२६ मध्ये हिंदी, तमिळ, तेलुगू, मल्याळम आणि कन्नड भाषांमध्ये चित्रपटगृहांत प्रदर्शित केला जाणार आहे. उत्तर भारतात चित्रपटाच्या वितरणाची जबाबदारी एए फिल्म्सकडे असणार आहे. नयनताराच्या लोकप्रिय भूमिकेचे पुनरागमन आणि चित्रपटाची भव्यता पाहता ‘महाशक्ती’बाबत दक्षिण भारतीय चित्रपटसृष्टीसोबतच हिंदी प्रेक्षकांमध्येही उत्सुकता निर्माण झाली आहे.

---------------

हिंदुस्थान समाचार / Suraj Chaugule