मुंबई, 16 सप्टेंबर (हिं.स.) : भारतातील वाढत्या खाण क्षेत्राला बळ देण्यासाठी आणि 'आत्मनिर्भर भारत' मोहिमेला गती देण्यासाठी 'असेन्सो टायर्स'ने १०० दशलक्ष अमेरिकन डॉलर्सच्या गुंतवणुकीची घोषणा केली आहे. ही गुंतवणूक भारतातील उत्पादन सुविधांमध्ये ऑल स्टील रॅडियल (ASR) जायंट मायनिंग टायर्सची निर्मिती क्षमता वाढवण्यासाठी वापरली जाईल. २५ इंच टायर्सपासून सुरुवात करत कंपनीने आता ४९ इंच टायर्सपर्यंत आपल्या पोर्टफोलिओचा विस्तार केला असून, भविष्यात याहून मोठ्या आकाराचे टायर्स विकसित करण्याची योजना आहे. या उपक्रमामुळे भारत आता खाणकामासाठी लागणाऱ्या मोठ्या टायर्सच्या आयातीवरील अवलंबित्व कमी करू शकेल.
पूर्वी भारताला जायंट मायनिंग टायर्ससाठी परदेशी उत्पादकांवर अवलंबून राहावे लागत होते. मात्र, असेन्सोच्या या विस्तारामुळे इन-हाउस डिझाइन आणि उत्पादनासह जायंट टायर्सच्या क्षेत्रात प्रवेश करणारा हा केवळ दुसरा भारतीय ब्रँड ठरला आहे. जागतिक स्तरावरील आघाडीच्या ब्रँड्सच्या तोडीची कामगिरी भारतीय खाण चालकांना वाजवी किंमतीत उपलब्ध करून देणे हा या रणनीतीचा मुख्य उद्देश आहे. यामुळे कोळसा, लोहखनिज आणि दुर्मिळ खनिजांच्या उत्खननात गुंतलेल्या वाहनांची उत्पादकता आणि इंधन कार्यक्षमता वाढून एकूण ऑपरेटिंग खर्च कमी होण्यास मदत होईल.
रोडमॅप
ग्राहकांच्या प्रत्यक्ष गरजा समजून घेण्यासाठी असेन्सोने ओडिशा, झारखंड, छत्तीसगड आणि कर्नाटक यांसारख्या प्रमुख खाण पट्ट्यांमध्ये १५ हून अधिक 'फिल्ड ॲप्लिकेशन इंजिनिअर्स' तैनात केले आहेत. हे तज्ज्ञ खाणींमधील वास्तववादी परिस्थितीचा अभ्यास करून R&D टीमला डेटा पाठवतील. असेन्सोने २०२७ आणि २०२८ पर्यंत खाणकाम, अर्थमूव्हिंग आणि लोडर ॲप्लिकेशन्ससाठी नवीन आकारांचे टायर्स बाजारात आणण्याचा आक्रमक रोडमॅप तयार केला आहे. ही गुंतवणूक भारताला जागतिक पातळीवर एक मजबूत मायनिंग टायर उत्पादन केंद्र म्हणून स्थापित करेल.
---------------
हिंदुस्थान समाचार / सुधांशू जोशी
