नवी दिल्ली, 16 सप्टेंबर (हिं.स.) वेस्ट इंडिज मालिकेसाठी भारतीय एकदिवसीय संघाची घोषणा करण्यात आली आहे. भारत या महिन्याच्या अखेरीस वेस्ट इंडिजविरुद्ध तीन एकदिवसीय सामन्यांची मालिका खेळणार आहे. या मालिकेत शुभमन गिल संघाचे नेतृत्व करेल. श्रेयस अय्यरच्या अनुपस्थितीत केएल राहुलची उपकर्णधार म्हणून नियुक्ती करण्यात आली आहे.

वेस्ट इंडिजविरुद्धच्या भारतीय एकदिवसीय संघाबद्दल बोलायचे झाल्यास, आकिब नबी आणि नमन धीर यांचा संघात पहिल्यांदाच समावेश करण्यात आला आहे. जसप्रीत बुमराह २०२६ च्या आशियाई खेळांसाठी जपान दौऱ्यावर असल्यामुळे तो संघाबाहेर असेल. बुमराहच्या जागी सिराज एकदिवसीय क्रिकेटमध्ये वेगवान गोलंदाजीचे नेतृत्व करेल. ऋषभ पंतला केएल राहुलसोबत दुसरा यष्टीरक्षक म्हणून स्थान मिळवता आले नाही आणि व्यवस्थापनाने त्याच्याऐवजी ध्रुव जुरेलला पसंती दिली आहे. श्रेयस अय्यर टी-२० आशियाई खेळांमध्ये भारतीय संघासोबत असेल, तर ऋतुराज गायकवाडला संधी देण्यात आली आहे.

भारतीय संघ वेस्ट इंडिजविरुद्ध तीन एकदिवसीय सामन्यांच्या मालिकेला २७ सप्टेंबर रोजी तिरुवनंतपुरम येथे सुरुवात करेल. दुसरा सामना ३० सप्टेंबर रोजी गुवाहाटी येथे आणि तिसरा सामना ३ ऑक्टोबर रोजी मुल्लानपूर येथे खेळला जाईल. यानंतर टी-२० मालिका होईल. आशियाई खेळ वेस्ट इंडिजविरुद्धच्या एकदिवसीय मालिकेच्या वेळीच आहेत. परिणामी, ५० षटकांच्या सामन्यांचा नियमित उपकर्णधार श्रेयस अय्यर उपलब्ध नसेल, कारण तो जपानमध्ये टी-२० संघाचे नेतृत्व करणार आहे.

वेस्ट इंडिज विरुद्ध भारतीय संघ:

एकदिवसीय संघ: शुभमन गिल (कर्णधार), रोहित शर्मा, विराट कोहली, ऋतुराज गायकवाड, केएल राहुल (उपकर्णधार आणि यष्टीरक्षक), ध्रुव जुरेल, नितीश कुमार रेड्डी, रवींद्र जडेजा, कुलदीप यादव, प्रसिध कृष्णा, गुरनूर ब्रार, मोहम्मद सिराज, आकिब नबी, यशस्वी जैस्वाल, नमन धीर.

टी20 संघ : श्रेयस अय्यर (कर्णधार), अभिषेक शर्मा, वैभव सूर्यवंशी, इशान किशन (यष्टीरक्षक), संजू सॅमसन (यष्टीरक्षक), टिळक वर्मा (उपकर्णधार), शिवम दुबे, कुलदीप यादव, अक्षर पटेल, वॉशिंग्टन सुंदर, रवी बिश्नोई, नितीशकुमार रेड्डी, अर्शदीप सिंग, प्रिन्स यादव, मयंक यादव.

---------------

हिंदुस्थान समाचार / वृषाली देशपांडे