नवी दिल्ली, 18 सप्टेंबर (हिं.स.)। देशाची अर्थव्यवस्था आणि सरकारी तिजोरीसाठी दिलासा देणारी बातमी आहे. चालू आर्थिक वर्ष २०२६-२७ मध्ये सरकारचे शुद्ध प्रत्यक्ष कर संकलन १७ सप्टेंबरपर्यंत १३ टक्क्यांनी वाढून १२.१२ लाख कोटी रुपयांहून अधिक झाले आहे. आगाऊ कर संकलनात झालेल्या वाढीमुळे प्रत्यक्ष कर संकलन वाढले आहे.
केंद्रीय प्रत्यक्ष कर मंडळाच्या (सीबीडीटी) आकडेवारीनुसार, १७ सप्टेंबरपर्यंत एकूण प्रत्यक्ष कर संकलन १५ टक्क्यांनी वाढून १४.३२ लाख कोटी रुपयांहून अधिक झाले आहे. त्याचवेळी कर परतावाही २९.१९ टक्क्यांनी वाढून २.२० लाख कोटी रुपयांहून अधिक झाला आहे. कॉर्पोरेट कर संकलन १९.४८ टक्क्यांनी वाढून सुमारे ५.५६ लाख कोटी रुपये झाले. याच कालावधीत बिगर-कॉर्पोरेट कर म्हणजेच वैयक्तिक आणि हिंदू अविभक्त कुटुंबांकडून मिळणारे कर संकलन ६ टक्क्यांनी वाढून ६.१६ लाख कोटी रुपयांहून अधिक झाले आहे. तसेच, १ एप्रिल ते १७ सप्टेंबरदरम्यान सिक्युरिटीज ट्रान्झॅक्शन टॅक्स (एसटीटी) संकलन ५३ टक्क्यांनी वाढून ४० हजार २१४ कोटी रुपये झाले.
आकडेवारीनुसार, १७ सप्टेंबरपर्यंत आगाऊ कर संकलन १६.१८ टक्क्यांनी वाढून सुमारे ५.२२ लाख कोटी रुपये झाले आहे. यामध्ये आगाऊ कॉर्पोरेट कर भरणा १८ टक्क्यांनी वाढून ४.१६ लाख कोटी रुपयांहून अधिक, तर बिगर-कॉर्पोरेट आगाऊ कर भरणा ९.२४ टक्क्यांनी वाढून १.०६ लाख कोटी रुपये झाला आहे.
---------------
हिंदुस्थान समाचार / Suraj Chaugule
