विसर्जनस्थळी स्वच्छता, आरोग्य, अग्निशमन, वाहतूक व सुरक्षा व्यवस्थेचा घेतला आढावा

अमरावती, 21 सप्टेंबर (हिं.स.)।गणेशोत्सवाच्या पार्श्वभूमीवर गणेशमूर्ती विसर्जनासाठी अमरावती महानगरपालिका व संबंधित प्रशासनाकडून करण्यात आलेल्या तयारीचा आमदार रवि राणा यांनी सोमवार, २१ सप्टेंबर रोजी प्रत्यक्ष पाहणी करून आढावा घेतला. शहरातील प्रमुख विसर्जनस्थळ असलेल्या छत्री तलाव तसेच दस्तुरनगर चौक परिसराला भेट देऊन त्यांनी विसर्जनाच्या नियोजनाची माहिती घेतली.

गणेश विसर्जनाच्या दिवशी मोठ्या संख्येने गणेशभक्त व नागरिक विसर्जनस्थळी येत असल्याने नागरिकांची गैरसोय होऊ नये, वाहतुकीची कोंडी निर्माण होऊ नये तसेच विसर्जन प्रक्रिया सुरक्षित व सुरळीत पार पडावी, यासाठी महानगरपालिका प्रशासनाने केलेल्या तयारीची यावेळी पाहणी करण्यात आली. विसर्जनस्थळी आवश्यक असलेल्या विविध सुविधांची माहिती संबंधित अधिकाऱ्यांकडून घेण्यात आली.या पाहणीदरम्यान गणेश विसर्जनासाठी करण्यात आलेल्या नियोजनाची सविस्तर माहिती सहाय्यक आयुक्त नितीन बोबडे यांनी आमदार रवि राणा यांना दिली. विसर्जनस्थळी करण्यात येणारी स्वच्छता व्यवस्था, आरोग्य विभागाची तयारी, नागरिकांसाठी आवश्यक सुविधा, अग्निशमन विभागाची सज्जता तसेच प्रशासनाच्या विविध विभागांमध्ये करण्यात आलेला समन्वय याबाबत माहिती देण्यात आली.

नागरिकांच्या सुरक्षिततेला प्राधान्य

गणेश विसर्जनाच्या काळात मोठ्या प्रमाणावर भाविकांची गर्दी होण्याची शक्यता लक्षात घेऊन प्रशासनाकडून विविध उपाययोजना करण्यात येत आहेत. विसर्जनासाठी येणाऱ्या नागरिकांना सुरक्षितपणे विसर्जन करता यावे आणि कोणतीही अनुचित घटना घडू नये, यासाठी संबंधित विभागांनी आवश्यक ती खबरदारी घेण्याबाबत पाहणीदरम्यान आढावा घेण्यात आला.विसर्जनस्थळावरील स्वच्छता, आरोग्य सुविधा आणि आपत्कालीन परिस्थितीत तातडीने मदत उपलब्ध करून देण्याच्या दृष्टीने करण्यात आलेल्या तयारीचीही पाहणी करण्यात आली. तसेच अग्निशमन विभाग आणि वैद्यकीय पथकाच्या तयारीची माहिती घेण्यात आली.

विविध विभागांमध्ये समन्वयावर भरगणेश विसर्जनाचा कार्यक्रम सुरळीत पार पाडण्यासाठी महानगरपालिका, पोलीस विभाग, अग्निशमन विभाग, आरोग्य विभाग तसेच संबंधित यंत्रणांमध्ये समन्वय ठेवण्याबाबत यावेळी चर्चा करण्यात आली. विसर्जनाच्या दिवशी निर्माण होणारी गर्दी, वाहतूक व्यवस्था आणि नागरिकांची सुरक्षितता यासाठी संबंधित विभागांनी परस्पर समन्वयाने काम करण्याची आवश्यकता असल्याचे यावेळी स्पष्ट करण्यात आले.छत्री तलाव व दस्तुरनगर चौक परिसरातील पाहणीदरम्यान विसर्जनासाठी उपलब्ध करण्यात येणाऱ्या सुविधांचा प्रत्यक्ष आढावा घेण्यात आला. नागरिक व गणेशभक्तांना विसर्जनाच्या वेळी कोणत्याही प्रकारचा त्रास होऊ नये, यासाठी प्रशासनाकडून करण्यात येणाऱ्या उपाययोजनांची माहितीही घेण्यात आली.

या पाहणीदरम्यान अमरावती महानगरपालिका आयुक्त डॉ. मंगेश गोंदावले, उपमहापौर सचिन भेंडे, गटनेता नाना आमले, झोन सभापती इस्माईल कासम लालुवाले, किशोर जाधव, शिक्षण समिती सभापती ऍड. प्रीती रेवणे, सन्माननीय नगरसेवक व नगरसेविका, अतिरिक्त आयुक्त महेश देशमुख, अतिरिक्त आयुक्त शिल्पा नाईक, उपायुक्त भाग्यश्री बोरेकर, सहाय्यक आयुक्त नितीन बोबडे, भूषण पुसतकर, वैद्यकीय आरोग्य अधिकारी डॉ. विशाल काळे, वैद्यकीय अधिकारी (स्वच्छता) डॉ. अजय जाधव, उद्यान अधीक्षक शैलेश बोरकर, अग्निशमन अधीक्षक अजय पंधरे, वैद्यकीय अधिकारी डॉ. संदिप पाटबागे, उपअभियंता शरद तिनखेडे, अजय विंचुरकर, राजेश आगरकर तसेच पोलीस विभागाचे अधिकारी व कर्मचारी, सार्वजनिक विभागाचे अधिकारी व कर्मचारी आणि महानगरपालिका कर्मचारी उपस्थित होते.-------------------------------

हिंदुस्थान समाचार / अरुण जोशी