लंडन, 22 सप्टेंबर (हिं.स.)।येमेनमधील इराणसमर्थित हुती बंडखोरांचे वाढते हल्ले लक्षात घेता ब्रिटनने सौदी अरेबियाला मर्यादित लष्करी मदत देण्याचा निर्णय घेतला आहे. ब्रिटनचे पंतप्रधान अँडी बर्नहॅम यांनी सोमवारी सांगितले की, रॉयल एअर फोर्स म्हणजेच आरएएफ सौदी अरेबियाच्या लढाऊ विमानांना हवेतच इंधन भरण्याची सुविधा उपलब्ध करून देईल. ही व्यवस्था काही आठवड्यांसाठी असेल आणि परिस्थितीचा आढावा घेऊन त्यात बदल केला जाऊ शकतो.

येमेनमध्ये हुती बंडखोर आणि सौदीसमर्थित सरकार यांच्यातील संघर्ष पुन्हा तीव्र झाला आहे. हुती बंडखोर सौदी अरेबियावर क्षेपणास्त्रे आणि ड्रोनच्या माध्यमातून हल्ले करत आहेत. शनिवारी सौदीची राजधानी रियाधलाही लक्ष्य करण्यात आले होते. मात्र, हा हल्ला हवेतच रोखण्यात आला. हुती बंडखोरांनी लाल समुद्र आणि बाब अल-मंदेब सामुद्रधुनीमध्ये सौदीशी संबंधित जहाजांच्या वाहतुकीवर नाकेबंदीची घोषणाही केली आहे.

ब्रिटन आरएएफच्या माध्यमातून सौदीच्या विमानांना हवेतच इंधन भरण्याची सुविधा देणार आहे. ही मदत सुरुवातीला काही आठवड्यांसाठी असेल आणि त्यानंतर तिचा आढावा घेतला जाईल. आरएएफचे एक ‘व्हॉयेजर’ विमान सौदीच्या विमानांना इंधन पुरवण्यासाठी वापरले जाणार आहे. ब्रिटिश अधिकाऱ्यांच्या म्हणण्यानुसार, हे विमान सौदीच्या ‘संरक्षणात्मक’ मोहिमांना मदत करेल.

हुती बंडखोरांनी रियाधसह सौदीच्या विविध ठिकाणांवर क्षेपणास्त्रे आणि ड्रोन हल्ले केले आहेत. हुतींनी लाल समुद्र आणि बाब अल-मंदेब परिसरात सौदीशी संबंधित जहाजांना लक्ष्य करण्याची घोषणा केली आहे. सौदी अरेबियाने आपल्या मित्रदेशांकडे हवाई संरक्षणासाठी मदत मागितली आहे. हुती बंडखोरांनी सौदीशी संबंधित जहाजे तसेच सौदी अरेबियातील तेल प्रकल्पांनाही लक्ष्य केले आहे.

सौदी अरेबिया हा जगातील सर्वात मोठा तेल निर्यातदार देश आहे. दरम्यान, हुती बंडखोरांनी येमेनमध्ये पुढे सरकत या महिन्याच्या सुरुवातीला महत्त्वाचे बंदर शहर मोक्का आणि लाल समुद्रातील काही महत्त्वाच्या बेटांवर ताबा मिळवला. त्यामुळे बाब अल-मंदेबमधून जाणाऱ्या जहाजांवर नजर ठेवणे त्यांना शक्य होऊ शकते. या मार्गावरून सामान्यतः जगातील सुमारे १२ टक्के व्यापाराची वाहतूक होते.

पंतप्रधान बर्नहॅम यांनी सांगितले की, ब्रिटन स्वतःचे आणि संपूर्ण क्षेत्राचे हित सुरक्षित ठेवण्यासाठी हे पाऊल उचलत आहे. त्यांनी म्हटले की, सौदी अरेबियाला हल्ल्यांचा सामना करावा लागत असून भविष्यात आणखी व्यत्यय निर्माण होण्याची शक्यता आहे.ब्रिटनच्या मते, तेलाच्या पुरवठ्याचे मार्ग खुले ठेवणे आवश्यक आहे.ब्रिटनने हुतींच्या हल्ल्यांचा निषेध केला असून, प्रादेशिक स्थैर्य, नागरिकांची सुरक्षा आणि मानवतावादी मदत पोहोचवण्यासाठी मित्रदेशांसोबत काम करण्याचे सांगितले आहे.

अमेरिकेने बायडेन आणि ट्रम्प प्रशासनाच्या काळात हुती बंडखोरांविरोधात बॉम्बहल्ले केले होते. मात्र, यावेळी अमेरिका लष्करीदृष्ट्या सहभागी होण्यास फारशी इच्छुक नसल्याचे दिसत आहे. ब्रिटन आणि सौदी अरेबियामध्ये आधीपासूनच घनिष्ठ संरक्षण भागीदारी आहे.

गेल्या आठवड्यातील वृत्तानुसार, सौदी अरेबियाने फ्रान्स, ब्रिटन, पाकिस्तान आणि इजिप्तसह आपल्या मित्रदेशांकडे या भागात हवाई संरक्षण यंत्रणा तैनात करण्याची विनंती केली होती. हुती बंडखोर आणि इतर इराणसमर्थित गटांकडून होणाऱ्या क्षेपणास्त्र व ड्रोन हल्ल्यांपासून बचाव करण्यासाठी ही मदत मागण्यात आली होती.

---------------

हिंदुस्थान समाचार / Priyanka Bansode