सानो (जपान), 22 सप्टेंबर (हिं.स.)श्रेयस अय्यरच्या नेतृत्वाखालील भारतीय संघाला जपानविरुद्धचा आपला एकमेव ऐतिहासिक टी-२० सामना जिंकण्यासाठी संघर्ष करावा लागला. यजमान जपानने विश्वविजेत्यांना सामना सहज जिंकू दिला नाही आणि त्यांना कडवी झुंज दिली. एका क्षणी, सामन्याचे चित्र पालटणार असे वाटत होते. पण टी-२० आंतरराष्ट्रीय क्रमवारीत ४१ व्या स्थानावर असलेल्या आणि अनुभवाची कमतरता असलेल्या जपानला ते जमले नाही आणि ते भारताकडून दोन धावांनी पराभूत झाले. खराब हवामानामुळे सामन्यातील षटकांची संख्या कमी करण्यात आली. ज्यामुळे दोन्ही संघांना प्रत्येकी पाच षटके मिळाली. भारताने नाणेफेक जिंकून प्रथम फलंदाजी करण्याचा निर्णय घेतला. भारतीय संघाकडून एका शानदार फलंदाजीची अपेक्षा होती, पण तसे घडले नाही.

जपानच्या गोलंदाजांनी पाच षटकांत भारताला अजिबात मोकळीक दिली नाही आणि संघ चार गडी गमावून केवळ ३२ धावाच करू शकला. जपानी गोलंदाजांनी उत्कृष्ट कामगिरी केली आणि फलंदाजांनीही भारतीय आक्रमणाला आव्हान दिले, पण ते दोन धावांनी कमी पडले. ३३ धावांच्या लक्ष्याला प्रत्युत्तर देताना, जपानने पाच षटकांत तीन गडी गमावून ३० धावा केल्या.

जपानचा कर्णधार केंडेल काडोवाकी फ्लेमिंगने १२ चेंडूंमध्ये १२ धावा केल्या. लॅकलॅन यामामोटो-लेकने एक धाव, तर इब्राहिम ताकाहाशीने चार धावा केल्या. बेंजामिन इटो-डेव्हिसने नऊ धावा, तर अलेक्झांडर शिराई पॅटमोरने दोन धावा केल्या. वॉशिंग्टन सुंदरने भारतासाठी दोन बळी घेतले. भारत आता २०२६ मध्ये आशियाई क्रीडा स्पर्धेत सहभागी होणार आहे. २०२३ च्या स्पर्धेनंतर महिला क्रिकेट संघाने यावेळी पुन्हा सुवर्णपदक जिंकले आहे. आता श्रेयस अय्यरच्या संघाकडूनही तशाच अपेक्षा ठेवल्या जात आहेत. २०२३ मध्ये ऋतुराज गायकवाडच्या नेतृत्वाखाली भारतीय संघाने सुवर्णपदक जिंकले होते.

दरम्यान, जपानविरुद्ध अभिषेक शर्मा आपल्या पहिल्याच चेंडूवर बाद झाला. यामुळे २०२६ मध्ये टी२० आंतरराष्ट्रीय सामन्यांमध्ये त्याच्या शून्यावर बाद होण्याच्या एकूण संख्येची सात वेळा नोंद झाली आहे. त्याने टी२० आंतरराष्ट्रीय सामन्यांमध्ये एका कॅलेंडर वर्षात सर्वाधिक वेळा शून्यावर बाद होण्याच्या बाबतीत रवांडाच्या जॅपी बिमेनिमाना आणि ऑर्किड तुयिसेन्गे (२०२३) आणि पाकिस्तानच्या सॅम अयुब (२०२५) यांच्या प्रत्येकी सात वेळा शून्यावर बाद होण्याच्या विक्रमाची बरोबरी केली.

२०२६ मध्ये अभिषेकच्या नावावर आणखी एक नकोसा विक्रम नोंदवला गेला. या कॅलेंडर वर्षात तो पाच वेळा पहिल्याच चेंडूवर बाद झाला. टी२० आंतरराष्ट्रीय सामन्यांमध्ये एका कॅलेंडर वर्षात पहिल्याच चेंडूवर बाद होणाऱ्या फलंदाजांमध्ये ही संयुक्त-सर्वाधिक संख्या आहे. २०२६ मध्ये अभिषेक शर्मा १० वेळा शून्यावर बाद झाला आहे, जो एका कॅलेंडर वर्षात टी२० आंतरराष्ट्रीय सामन्यांमध्ये कोणत्याही फलंदाजाने केलेला सर्वाधिक शून्याचा विक्रम आहे.

---------------

हिंदुस्थान समाचार / वृषाली देशपांडे