वॉशिंग्टन, 22 सप्टेंबर (हिं.स.)।अमेरिकेचे राष्ट्राध्यक्ष डोनाल्ड ट्रम्प यांच्याशी संबंधित ‘ट्रम्प टीव्ही’ आता लाइव्ह स्ट्रीमिंग करणार आहे. या प्लॅटफॉर्मवर २४ तास आणि आठवड्याचे सातही दिवस सातत्याने सामग्री उपलब्ध करून दिली जाणार आहे. येथे प्रशासनाशी संबंधित ताज्या बातम्यांसोबतच महत्त्वाच्या घोषणा आणि यापूर्वी समोर आलेल्या प्रमुख घडामोडीही एकाच ठिकाणी पाहता येणार आहेत.

‘ट्रम्प टीव्ही’चा उद्देश राष्ट्राध्यक्ष आणि त्यांच्या प्रशासनाशी संबंधित माहिती थेट प्रेक्षकांपर्यंत पोहोचवणे हा आहे. लाइव्ह स्ट्रीममध्ये प्रशासनाच्या नव्या घोषणा, प्रमुख कार्यक्रम आणि इतर महत्त्वाच्या अपडेट्सचा समावेश केला जात आहे.‘ट्रम्प टीव्ही’चे स्ट्रीमिंग सातत्याने सुरू राहणार आहे. याचा अर्थ प्रेक्षकांना एखाद्या विशिष्ट कार्यक्रमाची किंवा घोषणेची प्रतीक्षा करण्याची गरज नसून, दिवसाच्या कोणत्याही वेळी या प्लॅटफॉर्मवर उपलब्ध सामग्री पाहता येणार आहे. यात प्रशासनाशी संबंधित नव्या अपडेट्ससोबतच यापूर्वीच्या महत्त्वाच्या घडामोडींचाही समावेश केला जात आहे. त्यामुळे एकाच प्लॅटफॉर्मवर ताज्या बातम्या आणि यापूर्वीच्या प्रमुख घडामोडी पाहण्याची सुविधा उपलब्ध होणार आहे.

सीएनएन, पॉलिटिको आणि एमएस नाऊला व्हाईट हाऊसमध्ये प्रवेश करण्यापासून रोखण्याचा निर्णय घेतल्यानंतर काही दिवसांनी व्हाईट हाऊसने २४ तास सुरू राहणारे डिजिटल चॅनेल ‘ट्रम्प टीव्ही’ सुरू केले आहे. सीएनएन, पॉलिटिको आणि एमएस नाऊ यांनी ट्रम्प प्रशासनाविरोधात न्यायालयात याचिका दाखल केलेली असतानाच हे चॅनेल सुरू करण्यात आले आहे. या तिन्ही माध्यम संस्थांनी आपल्या पत्रकारांना व्हाईट हाऊसमध्ये प्रवेश देण्याची मागणी केली आहे. या माध्यम संस्थांचा आरोप आहे की, त्यांच्या वार्तांकनावर नाराजी असल्यामुळे त्यांच्या पत्रकारांचा व्हाईट हाऊसमधील प्रवेश रोखण्यात आला आहे.

---------------

हिंदुस्थान समाचार / Priyanka Bansode