नवी दिल्ली , 24 सप्टेंबर (हिं.स.)।लोकसभेतील विरोधी पक्षनेते आणि काँग्रेसचे खासदार राहुल गांधी यांनी आयआयटी बॉम्बेतील दिवंगत विद्यार्थी साहिल वाकोडेच्या आई-वडिलांशी संवाद साधला. आपल्या मुलाला न्याय मिळवून देण्यासाठीच्या लढ्यात शक्य ती सर्व मदत करण्याचे आश्वासन त्यांनी साहिलच्या पालकांना दिले.

मिळालेल्या माहितीनुसार, राहुल गांधी यांनी साहिलचे आई-वडील रवींद्र आणि सोनाली वाकोडे यांच्याशी व्हिडिओ कॉलवरून संवाद साधला. हे दोघे वाशिम जिल्ह्यातून मुंबईकडे प्रवास करत असताना हा संवाद झाला. सुमारे १७ मिनिटांच्या या संभाषणादरम्यान राहुल गांधी यांनी आपण त्यांच्या पाठीशी असल्याचे सांगत त्यांना सर्वतोपरी मदतीचे आश्वासन दिले.

या व्हिडिओ कॉलदरम्यान साहिलचे आई-वडील, इंडियन यूथ काँग्रेसचे अध्यक्ष उदय भानू चिब आणि महाराष्ट्र काँग्रेसचे प्रमुख शिवराज मोरे हे देखील उपस्थित होते.

साहिलच्या मृत्यूची स्वतंत्र चौकशी करण्याची मागणी आणि त्यासाठी सुरू असलेल्या आंदोलनांच्या पार्श्वभूमीवर राहुल गांधी आणि साहिलच्या पालकांमध्ये हा संवाद झाला. साहिलच्या पालकांनी आरोप केला आहे की, त्यांच्या मुलाला आयआयटी बॉम्बेमध्ये जातीय भेदभाव आणि मानसिक छळाला सामोरे जावे लागले होते. या प्रकरणासाठी जबाबदार असलेल्या व्यक्तींवर कारवाई करण्याची मागणीही त्यांनी केली आहे.

आयआयटी बॉम्बेमध्ये बीटेकचे शिक्षण घेणाऱ्या साहिलचा मृतदेह १८ सप्टेंबरच्या संध्याकाळी त्याच्या वसतिगृहातील खोलीत लटकलेल्या अवस्थेत आढळून आला होता. त्याच्यावर मध्य-सत्र परीक्षेदरम्यान चॅटजीपीटीचा वापर केल्याचा आरोप होता. परीक्षेदरम्यान घडलेली ही घटना या प्रकरणाचा मुख्य केंद्रबिंदू ठरली आहे. एका प्राध्यापकाने साहिलला कथितरीत्या रोखून परीक्षा हॉलमधून बाहेर नेल्याचे सांगितले जात आहे.

बुधवारी काही दूरचित्रवाहिन्यांवर दाखवण्यात आलेल्या परीक्षा हॉलमधील सीसीटीव्ही फुटेजमध्ये साहिलच्या हालचाली दिसत असल्याचे सांगण्यात आले. त्यानंतर एक प्राध्यापक त्याच्याजवळ येऊन त्याला परीक्षा हॉलमधून बाहेर घेऊन जात असल्याचे या फुटेजमध्ये दिसत असल्याचा दावा करण्यात आला आहे.

---------------

हिंदुस्थान समाचार / Priyanka Bansode