नागोया (जपान), 24 सप्टेंबर (हिं.स.) : भारताने आशियाई क्रीडा स्पर्धेत रोइंगमध्ये पदक जिंकले. सतनाम सिंग आणि सलमान खान या जोडीने पुरुषांच्या डबल स्कल्स प्रकारात कांस्यपदक पटकावले. पुरुषांच्या सिंगल स्कल्समध्ये बलराज पनवार चौथ्या स्थानावर राहिल्याने त्याचे पदक थोडक्यात हुकले.

सतनाम सिंग आणि सलमान खान यांनी पुरुषांच्या डबल स्कल्सच्या अंतिम फेरीत ६:१३.२५ अशी वेळ नोंदवून कांस्यपदक जिंकले. या भारतीय जोडीने शर्यतीच्या सुरुवातीच्या टप्प्यात उत्कृष्ट कामगिरी केली आणि ५०० मीटर, १००० मीटर व १५०० मीटरपर्यंत दुसरे स्थान कायम राखले.

एका क्षणी, ही भारतीय जोडी सुवर्णपदक विजेत्या चीनच्या यी शुडी आणि नी यिदे या जोडीपेक्षा केवळ अर्धा सेकंद मागे होती. तथापि, अंतिम टप्प्यात सतनाम आणि सलमान यांचा वेग मंदावला आणि ते तिसऱ्या स्थानावर घसरले. चिनी जोडीने सुवर्णपदक जिंकले, तर उझबेकिस्तानच्या मेहरोजबेक ममातकुलोव आणि पावेल सोरिन यांनी रौप्यपदक पटकावले. भारतीय जोडी सुवर्णपदकापासून ३.४८ सेकंद आणि रौप्यपदकापासून २.७६ सेकंद मागे राहिली.

बलराज पनवारनेही पुरुषांच्या एकेरी स्कल्समध्ये पदकाची आशा निर्माण केली. तो ५०० मीटर, १००० मीटर आणि १५०० मीटरमध्ये दुसऱ्या स्थानी राहिला. तथापि, अंतिम ५०० मीटरमध्ये, उझबेकिस्तानच्या शख्बोज खोलमुरझाएव आणि जपानच्या तातसुया साकुरामा यांनी त्याला मागे टाकले. अंतिम टप्प्यात बलराज साकुरामाच्या सुमारे पाच सेकंद पुढे होता, परंतु अंतिम रेषेपर्यंत पोहोचला तेव्हा तो जपानी खेळाडूच्या आठ सेकंद मागे होता. बलराजने ६:५४.८० अशी वेळ नोंदवली आणि तो चौथ्या स्थानी राहिला. चीनच्या झिवेई डेंगने सुवर्णपदक जिंकले. बलराज त्याच्यापेक्षा सुमारे १५ सेकंद मागे राहिला आणि त्याचे पदक थोडक्यात हुकले.

---------------

हिंदुस्थान समाचार / वृषाली देशपांडे