वॉशिंग्टन, 24 सप्टेंबर (हिं.स.)।अमेरिकेने रशियाचे राष्ट्राध्यक्ष व्लादिमीर पुतिन यांना २०२६ मध्ये होणाऱ्या जी-२० शिखर परिषदेसाठी अमेरिकेत येण्याचे निमंत्रण दिले आहे. अमेरिकेचे परराष्ट्र मंत्री मार्को रुबिओ यांनी सांगितले की, अमेरिकेने रशियाचे राष्ट्राध्यक्ष व्लादिमीर पुतिन यांना डिसेंबरमध्ये मियामी येथे होणाऱ्या जागतिक नेत्यांच्या जी-२० शिखर परिषदेत सहभागी होण्यासाठी आमंत्रित केले आहे.

रुबिओ म्हणाले, “आम्ही राष्ट्राध्यक्ष पुतिन यांना जी-२० शिखर परिषदेसाठी आमंत्रित केले आहे. आम्हाला वाटते की, त्यांच्यासाठी केवळ अमेरिकेच्या राष्ट्राध्यक्षांशीच नव्हे, तर जगातील इतर नेत्यांशीही संवाद साधण्याची ही संधी असेल. ते हे निमंत्रण स्वीकारतील, अशी आम्हाला आशा आहे.”

रुबिओ यांनी पुढे म्हटले की, सध्याची आंतरराष्ट्रीय व्यवस्था चांगल्या स्थितीत नाही. ते म्हणाले, “आपल्याकडे कार्यक्षम आंतरराष्ट्रीय व्यवस्था असती, तर ते खूप चांगले झाले असते. उदाहरणार्थ, थायलंड आणि कंबोडियामधील संघर्ष, भारत आणि पाकिस्तानमधील संभाव्य संघर्ष, रवांडा आणि डीआरसीमध्ये सुरू असलेली परिस्थिती, सुदानमधील संकट किंवा इराणसोबत स्ट्रेट ऑफ हॉर्मुजमध्ये सुरू असलेल्या परिस्थितीसारख्या समस्यांना सामोरे जाण्यासाठी अशी व्यवस्था उपयुक्त ठरली असती.”

“असे दिसते की, या मुद्द्यांवर तोडगा काढण्यासाठी आपल्याकडे सध्या कार्यक्षम आंतरराष्ट्रीय व्यवस्था नाही. अशी व्यवस्था नसल्यास देश आपापल्या राष्ट्रीय हितानुसार निर्णय घेतील. आम्ही कधीही आंतरराष्ट्रीय व्यवस्थेला अमेरिकेच्या हितांपेक्षा वरचे स्थान देणार नाही,” असेही रुबिओ यांनी स्पष्ट केले.

यंदाची जी-२० शिखर परिषद अमेरिकेतील मियामी येथे होत आहे. सध्या जी-२० अध्यक्षपद अमेरिकेकडे आहे. २०२५ ची जी-२० शिखर परिषद दक्षिण आफ्रिकेतील जोहान्सबर्ग येथे झाली होती. आफ्रिकन खंडावर आयोजित करण्यात आलेली ही पहिली जी-२० शिखर परिषद होती.पुढील वर्षी म्हणजेच २०२७ मध्ये जी-२० शिखर परिषदेचे यजमानपद ब्रिटनकडे असणार आहे.

---------------

हिंदुस्थान समाचार / Priyanka Bansode