धाराशिव, 04 सप्टेंबर (हिं.स.)।

जिल्ह्यातील सर्व मंडळ अधिकारी, तहसीलदार,उपविभागीय अधिकारी, उपजिल्हाधिकारी (भूसंपादन), उपजिल्हाधिकारी आणि अपर जिल्हाधिकारी यांच्या स्तरावर ७ ऑक्टोबर २०२६ आणि ९ डिसेंबर २०२६ रोजी महसूल लोकअदालतींचे आयोजन करण्यात येणार आहे.त्यासाठी प्रशासनाने निश्चित कार्यपद्धती आखली आहे.

दोन्ही पक्षकारांना संयुक्त अर्ज करता येणार

ज्या न्यायालयात किंवा कार्यालयात महसुली दावा प्रलंबित आहे,तेथे संबंधित दोन्ही पक्षकार किंवा त्यांचे वकील संयुक्तपणे विहित ‘प्रपत्र-अ’ मधील नमुन्यात तडजोडीसाठी अर्ज करू शकतील.‘प्रपत्र-अ’ संबंधित कार्यालयात उपलब्ध करून देण्यात येणार आहे.प्राप्त झालेल्या अर्जांची संबंधित यंत्रणेकडून छाननी केली जाईल.दोन्ही पक्षांची तडजोडीसाठी संमती असल्याची खात्री करण्यात येईल.त्यानंतर त्यांच्याकडून कायदेशीर तडजोडनामा (Consent Terms) लिहून घेतला जाईल.

तडजोडीनंतर अंतिम आदेश

निश्चित केलेल्या लोकअदालतीच्या दिवशी दोन्ही पक्षकारांच्या उपस्थितीत तडजोडीची प्रक्रिया पूर्ण केली जाईल. त्यानंतर अंतिम आदेश पारित करून संबंधित प्रकरण कायमस्वरूपी निकाली काढण्यात येणार आहे.त्यामुळे दीर्घकाळ प्रलंबित महसुली वाद परस्पर सहमतीने सोडविण्यासाठी नागरिकांना या अभियानाच्या माध्यमातून व्यासपीठ उपलब्ध होणार आहे.

कार्यालयीन वेळेत अर्ज करण्याचे आवाहन

महसुली दावे आणि अपिले तडजोडीने निकाली काढू इच्छिणाऱ्या नागरिकांनी या अभियानाचा लाभ घ्यावा.त्यासाठी कार्यालयीन कामकाजाच्या दिवशी, कार्यालयीन वेळेत संबंधित अधिकाऱ्यांकडे त्वरित अर्ज दाखल करावा,असे आवाहन जिल्हा प्रशासनाच्या वतीने अपर जिल्हाधिकारी ज्योती पाटील यांनी केले आहे.

---------------

हिंदुस्थान समाचार / Hanumant Madanrao Chitnis