शेनझेन, 04 सप्टेंबर (हिं.स.)। भारतीय बॅडमिंटनपटू किदांबी श्रीकांतचा चायना मास्टर्स २०२६ मधील प्रवास उपांत्यपूर्व फेरीतच संपला. श्रीकांतला शुक्रवारी शेनझेन एरिनामध्ये हाँगकाँगच्या ली चियुक यिऊविरुद्ध १६-२१, १६-२१ असा पराभव पत्करावा लागला.

श्रीकांतने पहिल्या गेमची सुरुवात सलग दोन पॉइंट्स मिळवून केली, मात्र ली चियुक यिऊने लवकरच कमबॅक करत सामन्यावर नियंत्रण मिळवले. हाँगकाँगच्या खेळाडूने आपली आघाडी कायम ठेवली आणि भारतीय खेळाडूने उशिरा केलेल्या कमबॅकच्या प्रयत्नांनंतरही पहिला गेम २१-१६ असा आपल्या नावावर केला. दुसऱ्या गेममध्येही ली चियुक यिऊने अधिक चांगले नियंत्रण कायम ठेवले आणि २१-१६ असा विजय मिळवत सामना सरळ गेम्समध्ये आपल्या नावावर केला.

या पराभवासह ली चियुक यिऊविरुद्ध श्रीकांतचा खराब रेकॉर्ड आणखी वाढला. भारतीय खेळाडूला हाँगकाँगच्या या शटलरविरुद्ध सलग चौथ्या पराभवाला सामोरे जावे लागले आहे. दोघांमधील आतापर्यंतच्या लढतींमध्ये श्रीकांतचा एकमेव विजय २०१८ इंडिया ओपनच्या पहिल्या राउंडमध्ये मिळाला होता. श्रीकांतने यापूर्वी अंतिम-८ मध्ये पोहोचण्यासाठी मागील राउंडमध्ये वर्ल्ड नंबर-९ व्हिक्टर लाईला सरळ गेम्समध्ये पराभूत केले होते. त्याने टूर्नामेंटच्या सुरुवातीच्या राउंडमध्ये चायनीज तैपेईच्या वर्ल्ड नंबर-२१ ची यू-जेनला ३५ मिनिटांत २१-१६, २१-१५ असे हरवले होते.

मात्र उपांत्यपूर्व फेरीमध्ये पराभव झाल्याने श्रीकांतची मोहीम संपली असली, तरी चायना मास्टर्समधील त्याची कामगिरी महत्त्वपूर्ण राहिली. तीन वर्षांनंतर प्रथमच श्रीकांत बीडब्ल्यूएफ वर्ल्ड टूर सुपर ७५० किंवा त्याहून मोठ्या स्तरावरील टूर्नामेंटमध्ये क्वार्टर फायनलपर्यंत पोहोचला होता.

---------------

हिंदुस्थान समाचार / Suraj Chaugule