नवी दिल्ली, 05 सप्टेंबर (हिं.स.)। रॉयल एनफिल्डने भारतात आपली नवी ‘हिमालयन ४४०’ ही ॲडव्हेंचर टूरिंग मोटारसायकल अधिकृतपणे लाँच केली आहे. या बाईकची एक्स-शोरूम किंमत २.२९ लाख रुपये ठेवण्यात आली आहे. कंपनीने ‘हिमालयन ४५०’च्या तुलनेत अधिक सुलभ, किफायतशीर आणि दैनंदिन वापरासाठी उपयुक्त पर्याय म्हणून हे मॉडेल बाजारात आणले आहे. ‘हिमालयन’ नावाच्या प्रवासाला यंदा दहा वर्षे पूर्ण होत असून, त्याच पार्श्वभूमीवर हिमालयन ४४० सादर करण्यात आली आहे. या बाईकचे बुकिंग ४ सप्टेंबरपासून रॉयल एनफिल्डच्या डीलरशिप्स आणि अधिकृत वेबसाइटवर सुरू झाली आहे.

हिमालयन मॉडेल पहिल्यांदा २०१६ मध्ये सादर करण्यात आले होते. टूरिंग आणि ॲडव्हेंचर रायडिंगसाठी तयार करण्यात आलेल्या या बाईकने ताठ बसण्याची रचना, साधी मेकॅनिकल रचना आणि खराब तसेच खडतर रस्त्यांवर सहज धावण्याच्या क्षमतेमुळे रायडर्समध्ये लोकप्रियता मिळवली. हिमालयन ४४०च्या सुरुवातीच्या युनिट्सवर दहाव्या वर्धापन दिनाचे विशेष बॅज देण्यात येणार आहेत. ही बाईक सेला ब्लॅक, मस्टँग ब्राउन आणि नेलोंग व्हाइट या तीन रंगांमध्ये उपलब्ध आहे.

हिमालयन ४४०मध्ये ४४३ सीसीचे सिंगल-सिलेंडर, लाँग-स्ट्रोक इंजिन देण्यात आले असून, ते ६,२५० आरपीएमवर २५.४ बीएचपी पॉवर आणि ४,००० आरपीएमवर ३४ एनएम टॉर्क निर्माण करते. जुन्या पाच-स्पीड गिअरबॉक्सऐवजी यामध्ये सहा-स्पीड गिअरबॉक्स देण्यात आला आहे. इंजिनमधील सुधारणा करून आवाज, कंपने आणि कठोरता कमी करण्यावरही कंपनीने भर दिला आहे.

या बाईकमध्ये हाफ-डुप्लेक्स स्प्लिट-क्रॅडल फ्रेम, ४१ मिमी टेलिस्कोपिक फ्रंट फोर्क्स आणि मागील बाजूस लिंकेज-टाइप मोनोशॉक देण्यात आला आहे. २१-इंच पुढील आणि १७-इंच मागील वायर-स्पोक चाकांमुळे खराब रस्ते आणि ट्रेल रायडिंगसाठी ती अधिक सक्षम ठरते. बाईकमध्ये २२० मिमी ग्राउंड क्लिअरन्स, ८०० मिमी सीट उंची आणि ड्युअल-चॅनेल एबीएस देण्यात आले आहे. याशिवाय एलईडी हेडलॅम्प, डिजिटल-ॲनालॉग इन्स्ट्रुमेंट क्लस्टर, ट्रिपर नेव्हिगेशन आणि यूएसबी टाइप-सी चार्जिंग पोर्ट यांसारखी आधुनिक वैशिष्ट्येही मिळतात.

१५ लिटरची इंधन टाकी आणि सामान वाहून नेण्याची चांगली क्षमता असल्याने हिमालयन ४४० लांब पल्ल्याच्या प्रवासासाठीही उपयुक्त ठरते. कंपनीकडून हार्ड पॅनियर्स, टॉप बॉक्स, टूरिंग सीट्स, हँडगार्ड्स आणि इंजिन गार्ड्ससह विविध ॲक्सेसरीजही उपलब्ध करून देण्यात आल्या आहेत. त्यामुळे दैनंदिन प्रवासापासून साहसी मोहिमांपर्यंत बाईकला गरजेनुसार कस्टमाइझ करता येणार आहे.

---------------

हिंदुस्थान समाचार / Suraj Chaugule