बंगळुरू , 06 सप्टेंबर (हिं.स.)।बंगळुरूच्या केम्पेगौडा आंतरराष्ट्रीय विमानतळावर (केआयएबी ) रविवारी सकाळी मोठी दुर्घटना टळली. लंडनला जाणाऱ्या व्हर्जिन अटलांटिकच्या विमानाला उड्डाण घेतल्यानंतर लगेचच तांत्रिक बिघाड झाल्याने आपत्कालीन परिस्थितीत विमान पुन्हा विमानतळावर परतावे लागले.

बंगळुरू इंटरनॅशनल एअरपोर्ट लिमिटेड (बीआयएएल)च्या अधिकृत सूत्रांनुसार, बोईंग विमानातील सर्व २७० प्रवासी आणि क्रू सदस्य पूर्णपणे सुरक्षित आहेत. व्हर्जिन अटलांटिकचे हे विमान रविवारी सकाळी सुमारे ८:२० वाजता बंगळुरूहून लंडनच्या दिशेने रवाना झाले होते. मात्र, हवेत झेपावल्यानंतर विमानात काही तांत्रिक बिघाड झाल्याचे क्रू सदस्यांच्या लक्षात आले.

प्रवाशांच्या सुरक्षेच्या दृष्टीने पायलटांनी कोणताही विलंब न करता खबरदारीचे पाऊल उचलले आणि विमान पुन्हा बंगळुरू विमानतळाच्या दिशेने वळवले. सुरक्षितपणे लँडिंग करता यावे आणि मानक सुरक्षा प्रोटोकॉलचे पालन करता यावे, यासाठी विमानाने बंगळुरूला परतण्यापूर्वी जवळच्या तुमकुरू परिसराच्या हवाई हद्दीत अर्ध्या तासाहून अधिक काळ फेऱ्या मारल्या.

त्यानंतर केम्पेगौडा आंतरराष्ट्रीय विमानतळावर विमानाचे सुरक्षित लँडिंग करण्यात आले.या घटनेबाबत विमान कंपनी व्हर्जिन अटलांटिकच्या अधिकृत निवेदनाची प्रतीक्षा आहे. दरम्यान, विमानात नेमका कोणता तांत्रिक बिघाड झाला, याचा शोध घेण्यासाठी विमानतळाचे अधिकारी तपास करत आहेत.

---------------

हिंदुस्थान समाचार / Priyanka Bansode