इस्लामाबाद, 09 सप्टेंबर (हिं.स.)।येमेनमधील हूती बंडखोरांनी सौदी अरेबियावर क्षेपणास्त्रे आणि ड्रोनद्वारे हल्ले केल्यानंतर पाकिस्तानने तातडीने आपली भूमिका स्पष्ट केली आहे. पाकिस्तानचे संरक्षणमंत्री ख्वाजा आसिफ यांनी म्हटले आहे की, सौदी अरेबियावर हल्ला झाल्यास तो केवळ सौदीचा संघर्ष मानला जाणार नाही. तर हा तिन्ही देशांवरील हल्ला मानला जाईल. म्हणजेच सौदी अरेबियावर संकट आले तर पाकिस्तान त्याच्या पाठीशी ठामपणे उभा राहील.मात्र, पाकिस्तानने हेही स्पष्ट केले आहे की मक्का संरक्षण करार कोणत्याही दुसऱ्या देशावर हल्ला करण्यासाठी करण्यात आलेला नाही.

ख्वाजा आसिफ यांनी म्हटले की, येमेनमधील संघर्ष सौदी अरेबियापर्यंत पोहोचवण्याचा प्रयत्न झाल्यास मक्का करारातील सामूहिक संरक्षणाच्या तरतुदी लागू होऊ शकतात. याबाबत कोणताही संभ्रम असू नये, असेही त्यांनी स्पष्ट केले. पाकिस्तान या करारातील अटींनी बांधील असून, गरज पडल्यास तो सौदी अरेबियाच्या पाठीशी उभा राहील, असे त्यांनी सांगितले. मात्र, विशेष बाब म्हणजे हूती हल्ल्यांनंतर पाकिस्तान आणि सौदी अरेबिया यांच्यात कोणताही संपर्क झाल्याची माहिती आपल्याकडे नसल्याचेही आसिफ यांनी म्हटले आहे.

आसिफ यांनी स्पष्ट केले की, मक्का करार हा आक्रमक स्वरूपाचा करार नाही. म्हणजेच पाकिस्तान, सौदी अरेबिया आणि तुर्किये हे तिन्ही देश स्वतःहून कोणत्याही देशावर हल्ला करणार नाहीत. मात्र, तिन्ही देशांची संयुक्त लष्करी ताकद ही कोणत्याही संभाव्य आक्रमकासाठी मोठा संदेश असल्याचे त्यांनी म्हटले. आसिफ यांच्या मते, प्रत्येक हल्ल्याला थेट लष्करी कारवाईनेच प्रत्युत्तर देणे आवश्यक नाही. ते म्हणाले, “आपल्याला प्रत्येक वेळी विटेला दगडाने उत्तर देण्याची गरज नाही.”

पाकिस्तान, सौदी अरेबिया आणि तुर्किये यांनी ऑगस्टमध्ये मक्का येथे संरक्षण करार केला होता. या करारानुसार, एका सदस्यावर झालेला हल्ला हा तिन्ही देशांविरुद्धचा हल्ला मानला जाईल. ख्वाजा आसिफ यांनी सौदी अरेबियासाठी पाकिस्तानची बांधिलकी पुन्हा अधोरेखित केली आहे. त्यांनी या कराराचे स्वरूप बचावात्मक असल्याचे सांगत तो आक्रमक लष्करी आघाडी नसल्याचे स्पष्ट केले.

मंगळवारी इराणसमर्थित हूती बंडखोरांनी सौदी अरेबियातील अनेक भागांना लक्ष्य केले. क्षेपणास्त्रे आणि ड्रोनच्या माध्यमातून करण्यात आलेल्या या हल्ल्यांमध्ये शहरांसोबतच आर्थिक आणि ऊर्जा क्षेत्रातील महत्त्वाच्या पायाभूत सुविधांनाही लक्ष्य करण्यात आले. या हल्ल्यांमध्ये किमान 73 नागरिक जखमी झाले.हल्ल्यांनंतर सौदी अरेबियानेही आपल्या सार्वभौमत्वाच्या रक्षणासाठी आवश्यक ती पावले उचलण्याची तयारी दर्शवली आहे. त्यामुळे येमेनमधील संघर्ष आता सौदीच्या भूमीपर्यंत आणि तेथील महत्त्वाच्या ठिकाणांपर्यंत पोहोचल्याचे दिसत आहे.

हूती बंडखोरांचे म्हणणे आहे की, त्यांचे हल्ले हे सौदी अरेबियाने नुकत्याच केलेल्या हवाई हल्ल्यांना प्रत्युत्तर म्हणून करण्यात आले आहेत. सौदीने उत्तर-पश्चिम येमेनमधील त्यांच्या ताब्यात असलेल्या भागांवर हल्ले केल्याचा आरोप हूतींनी केला आहे.

सोमवारी त्यांनी अल हज्म शहरातील एका तुरुंगावर सौदीने बॉम्बहल्ला केल्याचा आरोप केला होता. हूतींच्या म्हणण्यानुसार, या हल्ल्यात किमान 11 जणांचा मृत्यू झाला.दुसरीकडे, सौदीच्या नेतृत्वाखालील अरब आघाडी गेल्या दशकभराहून अधिक काळ येमेनमधील आंतरराष्ट्रीय स्तरावर मान्यताप्राप्त सरकारला पाठिंबा देत आहे. आता हाच जुना संघर्ष सौदी अरेबियाच्या भूमीपर्यंत पोहोचत असल्याचे दिसत आहे.

---------------

हिंदुस्थान समाचार / Priyanka Bansode