जळगाव, 7 ऑक्टोबर, (हिं.स.) पिंप्राळा येथील हरवलेल्या तरुणाचा मृतदेह शेतातील विहिरीत आढळला. हातपाय तारेने बांधलेल्या अवस्थेत सापडल्यामुळे घातपात असल्याची शंका निर्माण झाली आहे. दरम्यान, या घटनेबाबत त्याच्या कुटुंबीयांनी कोणतीही शंका किंवा तक्रार नोंदवलेली नसल्ल्याची माहिती पोलिसांनी दिली आहे. कुन्हा गावाजवळील पिंप्राळा येथील भागवत पुरुषोत्तम पडोळकर (वय २७वर्षे) हा तरुण बुधवार दि. १ ऑक्टोबर रोजी संध्याकाळपासून कोणालाच दिसला नव्हता. त्याचा नातेवाइकांनी शोध घेतला असता तो सापडला नाही. वडील गावाजवळील विहिरीत पाहण्यासाठी गेले असता भागवत याचा मृतदेह पाण्यावर तरंगताना आढळला. घटनास्थळी फॉरेन्सिक टीमचे पथक आणि स्थानिक गुन्हे शाखेच्या पथकाने घटनास्थळी भेट देऊन पाहणी केली.

मृताचे हातपाय तारेने बांधलेले असल्यामुळे या घटनेत घातपाताचा संशय व्यक्त केला जात आहे. मात्र, भागवत पडोळकर याच्यावर काही दिवसांपासून उपचार सुरू होता, अशी माहिती मिळाली आहे. या घटनेबाबत त्याच्या कुटुंबीयांनी कोणतीही शंका किंवा तक्रार नोंदवलेली नाही. मृत तरुण अविवाहित आहे. याबाबतचा तपास मात्र पोलिस करीत आहेत. कुऱ्हा पोलीस चौकीचे पो. हे. कॉ. अशोक जाधव, पोलिस नाईक प्रदीप इंगळे, पो. कॉ. सागर सावे, प्रवीण जाधव, अनिल देवरे, श्रावण भिल्ल आदींनी घटनास्थळी तातडीने धाव घेतली. याशिवाय, डीवायएसपी सुभाष ढवळे आणि पोलिस निरीक्षक आशिष अडसूळ यांनीही घटनास्थळाला भेट दिली. पोलिस पाटील महादेव झाल्टे, ज्ञानेश्वर झाल्टे, अतुल झाल्टे, सूरज झाल्टे आणि राजू कांडेलकर यांच्या मदतीने मृतदेह विहिरीतून बाहेर काढण्यात आला. नंतर शवविच्छेदनासाठी तो मुक्ताईनगर येथे पाठवण्यात आला होता. दरम्यान या घटनेने गावात हळहळ व्यक्त होत आहे.

---------------

हिंदुस्थान समाचार / मनोहर कांडेकर