जळगाव, 4 नोव्हेंबर (हिं.स.) पिपळगाव शिंदाड (ता. पाचोरा) हरे गावात अवैध गुटखा साठवणूक करून त्याची विक्री करणाऱ्या व्यक्तीविरुद्ध पोलिसांनी केलेल्या कारवाईत सुगंधित पान मसाला व तंबाखूचा मोठा साठा जप्त करण्यात आला आहे. या प्रकरणी जितेंद्र रामकृष्ण बडगुजर (रा. रथ चौक, पिपळगाव हरे) या इसमाविरुद्ध गुन्हा दाखल करण्यात आला असून त्यास अटक करण्यात आली आहे.

सपोनी कल्याणी वर्मा यांना गुप्त बातमीदारामार्फत माहिती मिळाली की, पिपळगाव हरे येथील रथ चौक भागात जितेंद्र बडगुजर हा अवैधरीत्या गुटखा व सुगंधित तंबाखू साठवून विक्री करीत आहे. मिळालेल्या माहितीच्या आधारे त्यांनी ग्रे पोलीस पथकातील प्र.चापोना प्रकाश चापोने, पोकॉ अमोल पाटील, पोकॉ मुकेश लोकरे व इतरांसह पथक तयार करून तत्काळ छापा टाकण्याचे आदेश दिले. पथकाने संबंधित ठिकाणी धाड टाकली असता, आरोपी जितेंद्र बडगुजर हा २२,८८० रुपयांच्या किमतीचा “विमल” पान मसाला व सुगंधित तंबाखूचा साठा बेकायदेशीररीत्या ठेवून विक्री करत असल्याचे आढळले. तत्काळ अन्न सुरक्षा अधिकारी, जळगाव तसेच अन्न व औषध प्रशासन (महाराष्ट्र राज्य) यांना कळवून पंचनामा करण्यात आला.या प्रकरणी अन्न सुरक्षा आणि मानके अधिनियम २००६ च्या कलम २६(२)(iv), २७(३)(d)(e), ३०(२)(अ), तसेच भारतीय दंड संहितेतील कलम १२३, २२५, २७४, २७५ आणि कलम ५९(१) नुसार गुन्हा दाखल करण्यात आला आहे.

---------------

हिंदुस्थान समाचार / मनोहर कांडेकर