जळगाव, 5 नोव्हेंबर (हिं.स.) जळगाव जिल्हा पोलीस दलातील कार्यक्षम आणि निष्ठावान श्वान ‘जंजीर’ याच्या सेवामुक्तीचा समारंभ मंगळवारी (दि. ४ नोव्हेंबर) पोलीस अधीक्षक कार्यालयात पार पडला. या प्रसंगी मा. पोलीस अधीक्षक महेश्वर रेड्डी, अप्पर पोलीस अधीक्षक अशोक नखाते, श्वान पथक प्रभारी पो.उपनिरीक्षक देविदास वाघ, तसेच श्वान हस्तक पोहेकॉ निलेश झोपे, पोना प्रशांत कंकरे आणि पोहेकॉ संदीप परदेसी उपस्थित होते.

श्वान ‘जंजीर’चा जन्म १८ नोव्हेंबर २०१७ रोजी झाला असून, गुन्हे अन्वेषण विभाग, पुणे येथे त्याने तब्बल नऊ महिन्यांचे कठोर प्रशिक्षण घेतले. त्यानंतर ७ एप्रिल २०१८ रोजी त्याने जळगाव जिल्हा पोलीस दलात कार्यारंभ केला. गेल्या सात वर्षांत ‘जंजीर’ने चाळीसगाव, एमआयडीसी, भुसावळ शहर आणि इतर पोलीस ठाण्यांतील विविध गंभीर गुन्ह्यांमध्ये आरोपींचा मागोवा घेण्यात पोलीसांना मोलाची मदत केली. श्वान ‘जंजीर’च्या कुशल शोधकार्यामुळे अनेक गुन्ह्यांचे धागेदोरे पोलिसांना मिळाले असून, त्याच्या कार्यकौशल्याचे सर्वत्र कौतुक झाले आहे. सेवेच्या अखेरच्या दिवशी त्याचा सन्मानपूर्वक निरोप घेण्यात आला. या वेळी उपस्थित अधिकारी आणि कर्मचारी यांनी ‘जंजीर’च्या सेवेला सलाम ठोकत त्याच्यावर प्रेमाचा वर्षाव केला.

---------------

हिंदुस्थान समाचार / मनोहर कांडेकर