रायगड, 9 नोव्हेंबर (हिं.स.)। श्रीवर्धन तालुक्यातील राजकीय समीकरणात मोठी हालचाल झाली असून उद्धव बाळासाहेब ठाकरे गटाला मोठा धक्का बसला आहे. माजी जिल्हा परिषद सदस्य अविनाश कोळंबेकर आणि माजी महिला व बालकल्याण सभापती अक्षदा कोळंबेकर यांनी समर्थकांसह मुख्यमंत्री एकनाथ शिंदे यांच्या नेतृत्वाखालील शिंदे गटात प्रवेश केला. रानवली येथे मंत्री भरत गोगावले यांच्या उपस्थितीत झालेल्या या भव्य पक्षप्रवेश सोहळ्यात शेकडो कार्यकर्त्यांनी शिंदे गटात प्रवेश करून आपला विश्वास व्यक्त केला.

या वेळी मंत्री गोगावले म्हणाले, “श्रीवर्धन काहींची वैयक्तिक मालमत्ता नाही; निर्णय जनता घेणार आहे. आम्ही खोटं बोलत नाही, जनतेच्या आशीर्वादावर आणि गरीबांच्या विश्वासावर आमचं राजकारण टिकून आहे.” त्यांनी महात्मा फुले आरोग्य योजनेची मर्यादा वाढवण्याची आणि रोजगार हमी योजनेंतर्गत २६४ प्रकल्प सुरू करण्याची घोषणाही केली. बॉक्साईट खाणीच्या प्रश्नावर भाष्य करताना गोगावले म्हणाले, “ते चांगल्या मार्गाने आले तर उत्तम, नाहीतर त्यांचा जय हरी करायला वेळ लागणार नाही,” असा इशारा त्यांनी दिला.

या पक्षप्रवेशानंतर श्रीवर्धन तालुक्यात शिंदे गटात नवचैतन्य निर्माण झाले असून स्थानिक पातळीवर राजकीय समीकरणे नव्याने तयार होत आहेत. उद्धव ठाकरे गटातून अनेक कार्यकर्त्यांचे शिंदे गटात जाणे ही आगामी स्थानिक स्वराज्य निवडणुकांसाठी महत्त्वपूर्ण घडामोड मानली जात आहे. गोगावले यांच्या नेतृत्वाखाली श्रीवर्धन तालुक्यात शिंदे गट अधिक बळकट होत असल्याचे राजकीय निरीक्षकांचे मत आहे.

---------------

हिंदुस्थान समाचार / संदेश साळुंके