अकोला, 16 डिसेंबर (हिं.स.)। बिहारचे मुख्यमंत्री नितीश कुमार यांनी एका शासकीय कार्यक्रमादरम्यान नियुक्तीपत्र देताना एका मुस्लिम महिला डॉक्टरच्या चेहऱ्यावरचा हिजाब ओढून काढल्याच्या घटनेच्या निषेधार्थ अकोला शहरातील मोहम्मद अली चौकात जोरदार आंदोलन करण्यात आले. या वेळी आंदोलकांनी प्रतीकात्मक स्वरूपात जोडे मारून आपला रोष व्यक्त केला तसेच नितीश कुमार यांच्या विरोधात घोषणाबाजी केली.

आंदोलनात सहभागी नागरिकांनी “नितीश कुमार मुर्दाबाद” अशा घोषणा देत महिला सन्मान, धार्मिक स्वातंत्र्य आणि संविधानाने दिलेल्या अधिकारांच्या समर्थनार्थ आवाज उठवला. आंदोलकांचे म्हणणे आहे की, हिजाब हा मुस्लिम महिलांची धार्मिक ओळख आणि आत्मसन्मानाचे प्रतीक आहे. अशा प्रकारची घटना केवळ एका महिला डॉक्टरचा अपमान नसून संपूर्ण मुस्लिम समाजाच्या भावना दुखावणारी आहे.

या आंदोलनात इस्माईल भाई, असलम फत्ता, मुंशीजी, अय्यूब भाई (दूधवाले), रफीक सिद्दीकी, जावेद जकरिया, शेख अझीज सिकंदर, जमील भाई, निजाम भाई (मूर्तिजापूरवाले), जावेद खान, हाजी अशरफ गाझी, रफीक जकरिया, आसिफ मनोरवाला, समीर भुरानी, अमीर भाकेई, फैजान चव्हाण, हारून भाई, इमरान चव्हाण, चंदू भाई, सिपतैन खान यांच्यासह मोठ्या संख्येने नागरिक उपस्थित होते.

हे आंदोलन शांततेत पार पडले प्रतीकात्मक निषेधाच्या माध्यमातून या घटनेचा तीव्र निषेध करण्यात आला तसेच संबंधित जबाबदार व्यक्तीविरोधात कठोर कारवाईची मागणी करण्यात आली.

या प्रसंगी सामाजिक कार्यकर्ते व कच्छी मशिदीचे अध्यक्ष जावेद जकरिया यांनी सांगितले की लोकशाही देशात कोणत्याही महिलेच्या धार्मिक पोशाखाशी छेडछाड करणे अस्वीकार्य आहे. सार्वजनिक मंचावर एका महिला डॉक्टरसोबत असे वर्तन करणे हे महिला सन्मान, धार्मिक स्वातंत्र्य आणि संविधानिक मूल्यांच्या विरोधात आहे, असे त्यांनी नमूद केले.

आंदोलनकर्त्यांनी मागणी केली की बिहारचे मुख्यमंत्री नितीश कुमार यांनी या संपूर्ण प्रकरणावर सार्वजनिकरित्या महिलांची आणि मुस्लिम समाजाची माफी मागावी तसेच भविष्यात अशा घटना पुन्हा घडू नयेत यासाठी ठोस पावले उचलावीत.

---------------

हिंदुस्थान समाचार / जयेश गावंडे