हैदराबाद, 2 डिसेंबर (हिं.स.)। भारतातील अग्रगण्य रिअल इस्टेट विकासक गोदरेज प्रॉपर्टीज लिमिटेड (जीपीएल) ने हैदराबाद मेट्रोपॉलिटन डेव्हलपमेंट ऑथोरिटीच्या (एचएमडीए) ई-लिलावात कोकापेटमधील निओपोलिस परिसरातील सुमारे 5 एकर प्राइम भूखंडासाठी सर्वाधिक बोली लावली आहे. एमएसटीसी लिमिटेडच्या ई-टेंडरिंग पोर्टलवरील या ई-लिलावात जीपीएल सर्वोच्च बोलीदार ठरल्याची माहिती कंपनीने दिली आहे. पुढील शासकीय प्रक्रियेनंतर एचएमडीए तर्फे जमीनवाटपाचे पत्र जारी होणार आहे.

या महत्त्वाच्या भूखंडावर कंपनी प्रीमियम निवासी प्रकल्प विकसित करणार असून यात अंदाजे 2.5 दशलक्ष चौरस फूट विक्रीयोग्य क्षेत्र उपलब्ध होणार आहे. या प्रकल्पातून जवळपास 4,150 कोटी रुपयांच्या महसूल क्षमतेचा अंदाज व्यक्त करण्यात आला आहे. वेगाने विकसित होत असलेला निओपोलिस परिसर, फायनान्शियल डीस्ट्रीक्ट व एचआयटीईसी सिटीची जवळीक, आधुनिक पायाभूत सुविधा व आंतरराष्ट्रीय स्तरावरील शाळा, आरोग्यसेवा व रिटेल सुविधांमुळे हैदराबादमधील सर्वाधिक मागणी असलेल्या निवासी मायक्रो-मार्केट्सपैकी एक बनला आहे. उच्च उत्पन्न गटातील घरखरेदीदारांकडून वाढत्या मागणीमुळे या भागात हैदराबादमधील सर्वाधिक जमीनदर आणि प्रकल्पमूल्यांकन होत आहे.

या आधी ऑगस्ट 2025 मध्ये कुकटपल्ली येथे 7.825 एकर जमीन खरेदी केल्यानंतर, कोकापेटमधील या लिलावात मिळवलेले यश जीपीएलच्या हैदराबादमधील उपस्थितीला अधिक बळकट करते. कोकापेटमधील गोदरेज मॅडिसन अव्हेन्यू व राजेंद्रनगर येथील गोदरेज रीगल पॅव्हिलियन प्रकल्पांच्या यशानंतर हा पुढील महत्त्वाचा टप्पा मानला जात आहे. 2025 वर्षात हैदराबाद हे जीपीएलसाठी सर्वात वेगाने वाढणाऱ्या बाजारपेठांपैकी एक ठरले असून कंपनीने येथे 2,600 कोटी रुपयांहून अधिक विक्री नोंदवली आहे. यामुळे शहरातील निवासस्थानांच्या मजबूत मागणीसह या बाजारपेठेवरील कंपनीचा वाढता धोरणात्मक भर स्पष्ट दिसतो.

गोदरेज प्रॉपर्टीजचे व्यवस्थापकीय संचालक आणि मुख्य कार्यकारी अधिकारी गौरव पांडे यांनी सांगितले की, हैदराबादमधील सक्षम पायाभूत सुविधा वाढ आणि गुणवत्तापूर्ण निवासस्थानांची सातत्यपूर्ण मागणी हे शहराच्या दीर्घकालीन वाढीचे संकेत आहेत. या उच्च-संभाव्य बाजारपेठेत वेगवेगळ्या धोरणात्मक खरेदी आणि विशिष्ट प्रकल्पांतर्गत उपस्थिती वाढवण्याचा संकल्प त्यांनी व्यक्त केला. त्यांनी सांगितले की, विचारपूर्वक नियोजन, उत्कृष्ट रचना आणि ग्राहक-केंद्रित सुविधांसह प्रकल्प विकसित करून घरखरेदीदारांसाठी दीर्घकालीन मूल्य निर्माण करणे हे कंपनीचे प्रमुख उद्दिष्ट आहे.

---------------

हिंदुस्थान समाचार / Suraj Chaugule