बुलढाणा, 3 डिसेंबर (हिं.स.) - शरद पवार यांचे एकनिष्ठ साथीदार व राज्याचे जलपुरुष म्हणून ओळख असलेले भारत भाऊ बोंद्रे यांचे चिखलीत निधन झाले आहे. ते 84 वर्षांचे होते. 1967 पासून ते शरद पवार यांच्यासोबत होते. गेल्या काही दिवसांपासून वृद्धत्वामुळे त्यांना शारीरिक व्याधी जडल्या होत्या. उपचारासाठी डॉ.तायडे यांच्या हॉस्पिटलमध्ये भरती केलेले असतानाच त्यांनी अखेरचा श्वास घेतला. भारत भाऊंच्या निधनाने संपूर्ण जिल्ह्यावर शोककळा पसरली आहे.

भारत भाऊ बोंद्रे हे 1972 साली प्रथम चिखली विधानसभा मतदारसंघातून आमदार म्हणून निवडून आले होते. त्यानंतर सलग चार वेळा त्यांनी चिखली विधानसभेचे प्रतिनिधित्व केलं होतं. राज्याच्या मंत्रिमंडळातही त्यांनी पाटबंधारे मंत्री, उद्योग मंत्री व शिक्षण मंत्री म्हणून पदे भूषवली होती. पाटबंधारे मंत्री असताना ते बुलढाणा जिल्ह्यातील खडकपूर्णा प्रकल्प, पेनटाकळी प्रकल्प व जिगाव प्रकल्पाचे ते प्रणेते होते. यासह त्यांनी राज्यातील शेकडो प्रकल्पांना त्यावेळी मंजुरी व गती दिली होती. त्यामुळे त्यांना राज्यात जलपुरुष म्हणूनही ओळखलं जात होतं. त्यांच्या निधनाने बुलढाणा जिल्ह्यातील राजकीय क्षेत्रात हळहळ व्यक्त होत आहे.

1980 ते 1995 अशी सलग 15 वर्षे भारतभाऊ बोंद्रे यांनी चिखली विधानसभा मतदारसंघाचे प्रतिनिधित्व केले. याच काळात राज्याचे पाटबंधारे मंत्री म्हणूनही त्यांनी उल्लेखनीय काम केले. बुलढाणा जिल्ह्यातील खडकपूर्णा प्रकल्पाच्या उभारणीत भारतभाऊंचे मोठे योगदान होते. याशिवाय जिगाव प्रकल्प, पेन टाकळी प्रकल्प, कोराडी प्रकल्प, नळगंगा प्रकल्प यासह जिल्ह्यात अनेक छोटे-मोठे जल प्रकल्पांची भरणे भारत भाऊंच्या कार्यकाळात झाली. शेतकऱ्यांना सिंचनाची सोय उपलब्ध झाली तर शेतकरी समृद्ध होईल असे भारत भाऊ नेहमी म्हणायचे.

---------------

हिंदुस्थान समाचार / सुधांशू जोशी