हैद्राबाद, 28 मार्च (हिं.स.)।रिषभ पंतच्या नेतृत्वाखालील लखनौ सुपर जाएंट्सच्या संघानं आयपीएलच्या यंदाच्या हंगामातील पहिल्या विजयाची नोंद केली आहे. शार्दुल ठाकूरच्या भेदक माऱ्याच्या जोरावर धडाकेबाज फलंदाजीसह हवा काढत आधी लखनौच्या संघानं सनरायझर्स हैदराबादच्या संघाला १९० धावांवर रोखले.त्यानंतर या धावांचा पाठलाग करत लखनऊने हा सामना आपल्या नावावर केला.
शार्दुल ठाकूरसह लखनौ सुपर जाएंट्सच्या ताफ्यातील गोलंदाजांसमोर सनरायझर्स हैदराबादच्या एकाही स्फोटक फलंदाजाला धमाका करता आला नाही. ट्रॅविस हेडनं २६ चेंडूत केलेल्या ४७ धावा ही या ताफ्यातील फलंदाजाने केलेली सर्वोच्च धावसंख्या ठरली. दुसऱ्या बाजूला लखनौच्या ताफ्यातून शार्दुल ठाकुरनं सर्वाधिक ४ विकेट्स लक्षवेधी कामगिरी केली. पहिल्या स्पेलमध्ये त्याने एकाच षटकात अभिषेक शर्मा आणि इशान किशनला स्वस्तात माघारी पाठवलं. त्याच्याशिवाय आवेश खान, दिग्वेश राठी, रवी बिश्नोई आणि प्रिन्स यादव यांनी प्रत्येकी एक एक विकेट घेतली. सनरायझर्स हैदराबादच्या संघाने निर्धारित २० षटकात ९ बाद १९० धावांपर्यंत मजल मारत लखनौ संघासमोर १९१ धावांचे टार्गेट सेट केले होते.
सनरायझर्स हैदराबादच्या संघाने दिलेल्या धावांचा पाठलाग करताना मिचेल मार्शनं ३१ चेंडूत ७ चौकार आणि २ षटकाराच्या मदतीने यंदाच्या हंगामातील दुसऱ्या सामन्यात दुसरे अर्धशतक झळकावले. याशिवाय निकोलस पूरन यानेही २६ चेंडूत ६ चौकार आणि ६ षटकाराच्या मदतीने केलेल्या ७० धावा कुटत सलग दुसऱ्या अर्धशतकाला गवसणी घातली. रिषभ पंत १५ चेंडूत १५ धावा करून बाद झाला. अयुष बडोनी याने ६ धावा करून तंबूचा रस्ता धरला. त्यानंतर डेविड मिलरनं ७ चेंडूत नाबाद १३ धावा आणि अब्दुल समदनं ८ चेंडूत केलेल्या २२ धावांसह लखनौनं पहिला विजय साकार केला.
---------------
हिंदुस्थान समाचार / Priyanka Bansode
