रत्नागिरी, 3 एप्रिल, (हिं. स.) : पूर्णगड पोलीस ठाण्याच्या हद्दीमधील राहणाऱ्या सर्व १३ बांग्लादेशी नागरिकांना प्रत्येकी ६ महिने कैदेची आणि प्रत्येकी ५०० रुपयांच्या दंडाची शिक्षा आज सुनावण्यात आली.

रत्नागिरी जिल्हा पोलीस दलाच्या दहशतवादी विरोधी पथकाला ११ नोव्हेंबेर २०२४ रोजी एक माहिती मिळाली की पूर्णगड पोलीस ठाण्याच्या हद्दीमध्ये भारतामध्ये अनधिकृत प्रवेश केलेले बांग्लादेशी नागरिक राहत असल्याची माहिती मिळाली होती. त्या आधारे पोलिसांनी छापा घातला असता तेथे १३ बांग्लादेशी नागरिक आढळले. मिळून आले. वाहिद रियाज सरदार, रिजऊल हुसेन कारीकर, शरिफुल हौजिअर सरदार, फारूख महमंद जहिरली मुल्ला, हमीद मुसाफा मुल्ला, राजू अहमंद हजरतअली शेख, बाकीबिलाह अमिर हुसेन सरदार, सैदूर रेहमान मुबारक अली, आलमगीर हुसेन हिरा अबदुल कादर दलाल, मोहम्मद शाहेन समद सरदार, मोहम्मद नुरूझामन मोरोल बालायत अली, मोहम्मद नूरहसन जहर सरदार आणि मोहम्मद लालतू मोंदल किताब अली अशी त्यांची नावे आहेत.

त्यांच्याकडे अधिक माहिती घेऊन तपास केला असता त्यांना भारतीय असल्याबबतचे कुठल्याही प्रकारचे पुरावे सादर करता आले नाहीत. त्यावरून हे सर्व भारतामध्ये अनधिकृतरीत्या प्रवेश करून राहत असल्याची खात्री झाली. याच आधारे रत्नागिरी पोलीस दलाने पासपोर्ट अधिनियम, परदेशी व्यक्ती अधिनियमांतर्गत गुन्हा दाखल केला. या गुन्ह्याचा तपास पूर्णगड पोलीस ठाण्याचे प्रभारी अधिकारी रत्नदीप साळोखे यांनी केला आणि गुन्ह्याचे दोषारोप न्यायालयात सादर केले. आज या प्रकरणाची सुनावणी होऊन रत्नागिरी मुख्य न्यायदंडाधिकारी निखिल गोसावी यांनी १३ आरोपींना प्रत्येकी ६ महिने साधी कैद आणि ५०० रुपये दंडाची शिक्षा सुनावली आहे. जिल्हा पोलीस दलाकडून या सर्व दोषी बांग्लादेशी नागरिकांचे लवकरच प्रत्यार्पण करण्याबाबतची कार्यवाही केली जाणार आहे.

जिल्हा पोलीस अधीक्षक धनंजय कुलकर्णी यांनी या गुन्ह्यामध्ये महत्त्वपूर्ण कामगिरी करणारे तपासिक अधिकारी आणि दहशतवादीविरोधी पथकातील सर्व पोलीस अधिकारी, अंमलदार यांना प्रत्येकी एक हजार रुपयांचे बक्षीस जाहीर केले. तसेच सर्व पथकाचे अभिनंदन केले.

---------------

हिंदुस्थान समाचार / रत्नागिरी