जळगाव , 12 ऑगस्ट, (हिं.स.) धरणगाव तालुक्यातील चांदसर येथे मुलाने दारू पिण्यासाठी पैसे न दिल्याने पित्यावरच विळ्याने हल्ला केला. त्यात जखमी झालेल्या पित्याचा उपचारादरम्यान मृत्यू झाल्याची घटना घडली. छगन यादव कोळी (७५) असे मृत पित्याचे तर समाधान छगन कोळी (४२) असे संशयित मुलाचे नाव आहे.

याबाबत राजू सीताराम सोनवणे यांनी दिलेल्या फिर्यादीवरुन, मुलगा समाधान कोळी याच्याविरुद्ध धरणगाव पोलिसात खुनाचा गुन्हा दाखल करण्यात आला असून मुलाला अटक करण्यात आली आहे.

चांदसर येथे छगन कोळी व त्यांचा मुलगा समाधान यांच्यात दारू पिण्यावरून वाद झाला. समाधान हा वडिलांकडे दारुसाठी पैसे मागायचा आणि यासाठी त्रासही देत होता. पण वडिलांनी पैसे न दिल्याने समाधान याने घरात असलेल्या विळ्याने वडिलांच्या पोटावर वार केले. यात ते जखमी झाले. त्यांना रात्रीच जिल्हा रुग्णालयात दाखल करण्यात आले. उपचार सुरू असताना त्यांचा मृत्यू झाला.

हिंदुस्थान समाचार / मनोहर कांडेकर