इस्लामाबाद, 12 ऑगस्ट (हिं.स.)।पाकिस्तानचे लष्करप्रमुख जनरल असीम मुनीर यांनी दिलेल्या अणु हल्ल्याच्या धमकीनंतर, माजी परराष्ट्रमंत्री बिलावल भुट्टो झरदारी यांनीही भारताला युद्धाची चेतावणी दिली आहे. जर भारताने सिंधु जल करार स्थगित करून ठेवला आणि नदीवर बांध उभारला तर पाकिस्तान पुन्हा भारताविरुद्ध युद्ध पुकारेल, असा इशारा बिलावल भुट्टो यांनी दिला आहे. यासाठी त्यांनी पाकिस्तानच्या जनतेने समर्थन द्यावे, असे आवाहन देखील केले आहे.
सिंध सरकारच्या सांस्कृतिक विभागाने आयोजित केलेल्या एका कार्यक्रमात बोलताना बिलावल भुट्टो म्हणाले, “जर भारत सिंधू कराराचे पालन करत नाही, तर हे आमच्या इतिहासावर, संस्कृतीवर आणि सभ्यतेवर हल्ला आहे.” त्यांनी असा दावा केला की भारताची जलनीती आक्रमक आहे आणि ती पाकिस्तानला पाण्यापासून वंचित करण्याचा कट आहे. बिलावल यांनी असेही सांगितले की, युद्धाची वेळ आलीच तर पाकिस्तानातील लोक भारताचा सामना करण्यास सक्षम आहेत, आणि अशा परिस्थितीत पाकिस्तान आपले सर्व सहा नद्या परत घेऊ शकतो.
बिलावल भुट्टो यांनी पुढे पाकिस्तानच्या जनतेला आवाहन करताना म्हटले की, आम्हाला पाकिस्तानच्या जनतेच्या समर्थनाची गरज आहे. आपल्याला मोदींविरोधात आवाज उठवायचा आहे, ज्यामुळे आपण हा अन्याय थांबवू शकू. आपल्या जनतेत इतकी ताकद आहे की, आपण यांचा सहज सामना करू शकतो आणि आपल्या हक्काच्या सगळ्या गोष्टी त्यांच्याकडून परत मिळवू शकतो.
यापूर्वी फ्लोरिडामधील टॅम्पा येथे पाकिस्तानी प्रवाशांना संबोधित करताना, पाकिस्तानचे लष्करप्रमुख जनरल असीम मुनीर यांनी भविष्यात भारतासोबत युद्ध झाल्यास आणि देशाच्या अस्तित्वाला धोका निर्माण झाल्यास, पाकिस्तानकडून अणुहल्ला केला जाऊ शकतो, अशी धमकी दिली होती. अमेरिकेत उपस्थित असलेल्या मुनीर यांनी म्हटले की, जर भारताने पाकिस्तानकडे येणारा जलप्रवाह अडवण्याचा प्रयत्न केला, तर इस्लामाबाद भारताच्या पायाभूत सुविधांचा नाश करेल. मुनीर यांनी म्हटले, “आम्ही एक अण्वस्त्र संपन्न राष्ट्र आहोत. जर आम्हाला वाटले की आम्ही नष्ट होणार आहोत, तर आम्ही अर्ध्या जगालाही आपल्या सोबत विनाशाच्या मार्गावर घेऊन जाऊ.”
भारताने या धमक्यांना गांभीर्याने घेत कठोर प्रतिक्रिया दिली आहे. भारताच्या परराष्ट्र मंत्रालयाचे प्रवक्ते रणधीर जायसवाल यांनी म्हटले, “अण्वस्त्र हल्ल्याची धमकी देणे हे पाकिस्तानची सवय बनली आहे. भारत कोणत्याही अणु धमक्येसमोर झुकणार नाही आणि आपल्या राष्ट्रीय सुरक्षेच्या रक्षणासाठी आवश्यक ती सर्व पावले उचलेल.” भारताने हेही म्हटले की, अशा गैरजिम्मेदार विधानांमुळे त्या देशाच्या अणु कमांड आणि नियंत्रण यंत्रणेच्या विश्वसनीयतेवर गंभीर प्रश्न उपस्थित होतात, जिथे लष्कराचे संबंध दहशतवादी संघटनांशी आहेत.
सूत्रांच्या माहितीनुसार, पाकिस्तानची लष्करशाही जेव्हा जेव्हा अमेरिकेची थोडीशी साथ मिळवते, तेव्हा ती आपला खरा आक्रमक चेहरा दाखवते. यावरून हे स्पष्ट होते की पाकिस्तानमध्ये लोकशाही कमकुवत आहे आणि प्रत्यक्ष सत्तेवर लष्करच विराजमान आहे. भारताच्या कठोर भूमिकेमुळे पाकिस्तान अस्वस्थ झाला असून, त्याने प्रत्युत्तरात एक निवेदन देत म्हटले आहे की, भारताचे हे विधान तथ्यांशी छेडछाड करून मांडले गेले आहे
---------------
हिंदुस्थान समाचार / Priyanka Bansode
