रत्नागिरी, 17 जानेवारी, (हिं. स.) : रत्नागिरीतील महर्षी कर्वे स्त्री शिक्षण संस्थेच्या बाया कर्वे इन्स्टिट्यूट ऑफ स्किल डेव्हलपमेंट संस्थेमध्ये महाराष्ट्र राज्य कौशल्य, व्यवसाय शिक्षण व प्रशिक्षण मंडळाचे मान्यताप्राप्त अभ्यासक्रम सुरू झाले आहेत.

संस्थेत विद्यार्थिनी व महिलांसाठी अल्पमुदतीचे, रोजगाराभिमुख प्रशिक्षण अभ्यासक्रमांचे प्रवेश सुरू झाले असून संस्थेच्या मारुती मंदिर येथील कार्यालयात हे प्रवेश दिले जातात. कौशल्याधारित शिक्षणाद्वारे स्वावलंबन व स्वयंरोजगाराच्या संधी निर्माण करण्याचा संस्थेचा उद्देश आहे.

संस्थेमध्ये सर्टिफिकेट कोर्स इन ड्रेस मेकिंग (प्रवेशपात्रता – सातवी पास) तसेच सी.सी. इन प्रोफेशनल कोर्स इन ब्युटी कल्चर अँड हेअर ड्रेसिंग (प्रवेश पात्रता – बारावी पास) हे दोन अभ्यासक्रम फेब्रुवारी २०२६ पासून सुरू होणार असून दोन्ही अभ्यासक्रमांचा कालावधी ६ महिने असून प्रशिक्षण पूर्ण केल्यानंतर शासनमान्य प्रमाणपत्र दिले जाईल. यासाठी २५ जणींना प्रवेश मर्यादित आहेत. अर्धवट शिक्षण सोडलेल्या महिला, कॉलेज मध्ये जाणाऱ्या मुली व मुलींना या प्रशिक्षणाचा लाभ होणार आहे. बाया कर्वे स्किल डेव्हलपमेंट सेंटरच्या अधिकृत अनुभवी प्रशिक्षकांकडून प्रशिक्षण दिले जाईल. या प्रशिक्षणासाठी बाहेरगावातील विद्यार्थिनींना संस्थेच्या विद्यार्थिनी वसतिगृहात निवास व मेस सुविधा सशुल्क उपलब्ध करून दिली जाईल.

या अभ्यासक्रमाला ऑनलाइन पद्धतीने प्रवेश दिले जाणार असून रत्नागिरी जिल्ह्यातील इच्छुक महिला उमेदवाराना https://msbsvet.gov.in या संकेतस्थळावर ऑनलाइन नोंदणी करावी लागणार आहे. यासाठी विद्यार्थ्यांनी संस्थेचा संकेतांक क्रमांक MSB050201 निवडावा. तसेच नोंदणी व माहितीसाठी बाया कर्वे स्किल डेव्हलपमेंट इन्स्टिट्यूट, शॉप नं. २०२ ते २०६, नलावडे कमर्शियल सेंटर, पहिला मजला, मारुती मंदिर, रत्नागिरी येथे प्रत्यक्ष संपर्क साधावा किंवा ७४९९८२१३६९ या दूरध्वनी क्रमांकावर संपर्क करावा. असे आवाहन संस्थेतर्फे करण्यात आले आहे.

---------------

हिंदुस्थान समाचार / रत्नागिरी