नवी दिल्ली, 05 जानेवारी (हिं.स.)। अमेरिकेचे राष्ट्राध्यक्ष डोनाल्ड ट्रम्प यांनी टॅरिफविषयी दिलेल्या अलीकडील वक्तव्याच्या पार्श्वभूमीवर काँग्रेस पक्षाने केंद्र सरकारवर जोरदार टीका केली आहे. सोमवारी ट्रम्प यांनी सांगितले की वॉशिंग्टन लवकरच नवी दिल्लीवर टॅरिफ वाढवू शकते. यावरून काँग्रेसने टोला लगावत म्हटले की ‘नमस्ते ट्रम्प’, ‘हाउडी मोदी’ हे कार्यक्रम, जबरदस्तीचे आलिंगन आणि अमेरिकन राष्ट्राध्यक्षांची स्तुती करणाऱ्या सोशल मीडिया पोस्ट्स यांचा फारसा काहीही फायदा झालेला नाही.

काँग्रेसचे महासचिव जयराम रमेश यांनी ‘एक्स’ या सोशल मीडिया प्लॅटफॉर्मवर पोस्ट करत म्हटले, “व्हाईट हाऊसमधील पंतप्रधानांचे ‘जिवलग मित्र’ भारताबाबत कधी नरम, तर कधी कडक अशी भूमिका कायम ठेवत आहेत. भारताने रशियाकडून तेल खरेदी थांबवली नाही, तर अमेरिकेतून होणाऱ्या आयातीवर टॅरिफ वाढवण्याची त्यांनी पुन्हा धमकी दिली आहे.”

जयराम रमेश पुढे म्हणाले, “हे सर्व नमस्ते ट्रम्प आणि हाउडी मोदी कार्यक्रम, ते (जबरदस्तीचे) आलिंगन आणि अमेरिकन राष्ट्राध्यक्षांची स्तुती करणाऱ्या सोशल मीडिया पोस्ट्स—या सगळ्यांचा फारच मर्यादित परिणाम झाला आहे.”

दरम्यान, रविवारी पत्रकारांशी बोलताना ट्रम्प म्हणाले, “ते (भारत) मला खूश करू इच्छित होते. मोदी खूप चांगले व्यक्ती आहेत, ते मनाने चांगले आहेत. मी नाराज आहे, हे त्यांना माहीत होते, म्हणून मला खूश करणे त्यांच्यासाठी गरजेचे होते. ते रशियाशी व्यापार करतात आणि आम्ही त्यांच्यावर लवकरच टॅरिफ वाढवू शकतो. ते त्यांच्यासाठी फार वाईट ठरेल.”

ट्रम्प यांचे हे वक्तव्य त्या वेळी आले, जेव्हा त्यांच्यासोबत प्रवास करत असलेले अमेरिकन सिनेटर लिंडसे ग्रॅहम यांनी सांगितले की ट्रम्प यांनी भारतावर लावलेले टॅरिफ हेच मुख्य कारण आहे, ज्यामुळे नवी दिल्लीने रशियाकडून तेल खरेदी मोठ्या प्रमाणात कमी केली आहे.

ग्रॅहम यांनी त्यांच्या टॅरिफ विधेयकाबद्दलही माहिती दिली. या विधेयकाचा उद्देश रशियन तेल खरेदी करणाऱ्या देशांकडून होणाऱ्या आयातीवर 500 टक्के शुल्क लावणे हा आहे. रशिया–युक्रेन संघर्ष समाप्त करण्यासाठी रशियन राष्ट्राध्यक्ष व्लादिमीर पुतिन यांच्या ग्राहकांवर दबाव आणणे आवश्यक असल्याचेही ग्रॅहम यांनी स्पष्ट केले.

---------------

हिंदुस्थान समाचार / Priyanka Bansode