नवी दिल्ली, 10 मार्च (हिं.स.)आयपीएल २०२६ च्या आधी गुजरात टायटन्सने त्यांच्या सपोर्ट स्टाफमध्ये बदल केले आहेत. पार्थिव पटेलच्या जागी ऑस्ट्रेलियन क्रिकेट दिग्गज मॅथ्यू हेडन यांची नवे फलंदाजी प्रशिक्षक म्हणून नियुक्ती करण्यात आली आहे. ते आता सहाय्यक प्रशिक्षक म्हणून संघात राहतील. २०२५ च्या हंगामापूर्वी त्यांची फलंदाजी आणि सहाय्यक प्रशिक्षक म्हणून नियुक्ती करण्यात आली होती. आयपीएलमध्ये प्रशिक्षक म्हणून हेडनचा हा पहिलाच कार्यकाळ असेल. त्यांनी यापूर्वी पाकिस्तानचे मुख्य प्रशिक्षक म्हणून काम पाहिले आहे. हेडन आयपीएलमध्ये चेन्नई सुपर किंग्जचा भाग होता आणि तो संघाच्या दिग्गज क्रिकेटपटूंपैकी एक मानला जातो.

गुजरात टायटन्स २०२२ मध्ये आयपीएलमध्ये सहभागी झाला होता. आणि आपल्या पहिल्या हंगामात विजेतेपद जिंकल्यानंतर, ते पुढील हंगामाच्या अंतिम फेरीत पोहचले होते. तेव्हापासून, संघ प्लेऑफच्या पुढे प्रगती करू शकलेला नाही. शुभमन गिल हा संघाचा कर्णधार आहे, तर आशिष नेहरा हे मुख्य प्रशिक्षक आहेत.

गुजरात टायटन्सचे संचालक विक्रम सोलंकी हेडनच्या नियुक्तीबद्दल म्हणाले, मॅथ्यू आमच्या प्रवासात एका महत्त्वाच्या टप्प्यावर आला आहे. एक फ्रँचायझी म्हणून, आम्ही उत्कृष्टता आणि दीर्घकालीन यशासाठी वचनबद्ध आहोत. आम्ही आमच्या क्रिकेट परिसंस्थेला बळकटी देण्यावर सतत लक्ष केंद्रित करत आहोत. येत्या हंगामात आमची फलंदाजीची ओळख घडवण्यासाठी त्याचा उत्कृष्ट अनुभव आणि उदयोन्मुख प्रतिभेला मार्गदर्शन करण्याची क्षमता महत्त्वाची ठरेल.

गुजरातमध्ये सामील झाल्यावर हेडन म्हणाला की, तो फ्रँचायझीसोबत एक नवीन मानक प्रस्थापित करू इच्छितो. तो म्हणाला, चांगली फलंदाजी दबाव निर्माण करते. मजबूत फलंदाजी सामने जिंकते. गुजरात टायटन्समध्ये आम्ही हाच मानक मिळवण्याची आकांक्षा बाळगतो.

हेडनने ऑस्ट्रेलियासाठी २७३ आंतरराष्ट्रीय सामने खेळले, १५,००० हून अधिक धावा केल्या. त्याने ऑस्ट्रेलियाला आयसीसी स्पर्धांमध्ये वर्चस्व गाजवण्यास मदत केली. त्याने नऊ टी-२० आंतरराष्ट्रीय सामने खेळले, ज्यामध्ये १४४ च्या स्ट्राईक रेटने आणि ५१ च्या सरासरीने ३०८ धावा केल्या. २००८ ते २०१० पर्यंत तो चेन्नई सुपर किंग्जचा भाग होता. या काळात त्याने ३२ सामने खेळले आणि १३८ च्या स्ट्राईक रेटने आणि ३७ च्या सरासरीने ११०७ धावा केल्या. २०१० मध्ये सीएसकेने पहिल्यांदा आयपीएल ट्रॉफी जिंकली होती तेव्हा तो संघाचा भाग होता.

---------------

हिंदुस्थान समाचार / वृषाली देशपांडे