चंदीगड, 05 मे (हिं.स.)। हरियाणातील नूंह जिल्यात मंगळवारी सकाळी कुंडली-मानेसर-पलवल एक्सप्रेसवेवर एका भरधाव स्कॉर्पिओ गाडीने ओव्हरटेक करण्याच्या प्रयत्नात दुसऱ्या वाहनाला धडक दिली. या भीषण अपघातात उत्तर प्रदेश पोलिसांच्या चार जवानांसह पाच जणांचा जागीच मृत्यू झाला. सर्व पोलिस कर्मचारी उत्तर प्रदेशातील जालौन जिल्याच्या मुख्यालय उरई येथे तैनात होते.

मिळालेल्या माहितीनुसार, प्रत्यक्षदर्शींच्या म्हणण्यानुसार उत्तर प्रदेश पोलिसांची काळ्या रंगाची स्कॉर्पिओ पलवलकडे जात होती. तावडू सदर पोलीस ठाण्याच्या हद्दीत येणाऱ्या धुलावट टोल प्लाझाजवळ सकाळी सुमारे साडेदहा वाजता चालकाने समोरच्या वाहनाला ओव्हरटेक करण्याचा प्रयत्न केला. मात्र भरधाव वेगामुळे त्याचे नियंत्रण सुटले आणि समोरच्या वाहनाला जोरदार धडक बसली. ही धडक इतकी भीषण होती की स्कॉर्पिओ गाडी पूर्णपणे चक्काचूर झाली आणि त्यामध्ये बसलेले सर्व पाच जण अडकून पडले.

घटनेची माहिती मिळताच पोलीस आणि बचाव पथक घटनास्थळी दाखल झाले. पाचही जणांना बाहेर काढण्यासाठी बचाव पथकाला मोठी कसरत करावी लागली. नूंह जिल्यातील तावडू पोलीस ठाण्याचे प्रभारी शीशराम यादव यांनी सांगितले की, घटनेची माहिती मिळताच तत्काळ मदत आणि बचावकार्य सुरू करण्यात आले. अपघाताची भीषणता यावरून लक्षात येते की स्कॉर्पिओचे अक्षरशः तुकडे तुकडे झाले होते आणि पाचही जण गाडीच्या अवशेषांमध्ये अडकून मृत्यूमुखी पडले.

यानंतर मृतदेह बाहेर काढून शवविच्छेदनासाठी जवळच्या रुग्णालयात पाठवण्यात आले. ठाणे प्रभाऱ्यांनी सांगितले की घटनास्थळी मिळालेल्या ओळखपत्रांच्या आधारे चार पोलिस कर्मचाऱ्यांची ओळख पटली आहे. मृतांमध्ये एएसआय मोहित यादव, सत्यभान, अशोक आणि प्रदीप यांचा समावेश आहे. हे सर्व जालौन जिल्यात तैनात होते. पाचव्या मृत व्यक्तीची ओळख अद्याप पटलेली नाही.

ठाणे प्रभाऱ्यांनी पुढे सांगितले की या प्रकरणाची सखोल चौकशी सुरू असून पोलिस कर्मचारी कुठे जात होते आणि त्यांच्या येण्यामागचे कारण काय होते, याचा तपास केला जात आहे. सर्व पोलिस कर्मचारी काळ्या रंगाच्या स्कॉर्पिओ गाडीत प्रवास करत होते, जी हरियाणातील जींद आरटीओमध्ये नोंदणीकृत होती. ही गाडी अगदी नवीन असल्याचे सांगितले जात आहे.

या घटनेबाबत जालौन जिल्याचे पोलीस अधीक्षक विनय कुमार सिंह यांनी सांगितले की चार पोलिस कर्मचारी आणि एक अन्य व्यक्तीचा मृत्यू झाला आहे. प्राथमिक तपासात अतिवेग हे अपघाताचे मुख्य कारण मानले जात आहे. पोलिस मृतांच्या नातेवाईकांशी संपर्क साधत असून मृतदेह त्यांच्या गावी पाठवण्याची प्रक्रिया सुरू आहे.

---------------

हिंदुस्थान समाचार / Suraj Chaugule