जेरुसलेम , 10 जुलै (हिं.स.)।अमेरिकेचे राष्ट्राध्यक्ष डोनाल्ड ट्रम्प यांनी अमेरिका-इराण युद्धविराम करार संपुष्टात आल्याचे घोषित केल्यानंतर मध्यपूर्वेतील तणाव पुन्हा एकदा शिगेला पोहोचला आहे. दरम्यान, इस्रायलचे पंतप्रधान बेंजामिन नेतान्याहू यांनी गुरुवारी मोठे वक्तव्य करत इशारा दिला की इराणसोबतचा संघर्ष अद्याप संपलेला नाही आणि इस्रायलसमोर नव्या सुरक्षा आव्हानांचा सामना उभा आहे.
नेतान्याहू यांचे हे वक्तव्य अशा वेळी आले आहे, जेव्हा अलीकडेच पाकिस्तानच्या मध्यस्थीने झालेला शांतता करार पूर्णपणे कोलमडला आहे. त्यामुळे दोन्ही देशांमधील मोठ्या प्रमाणावरील संघर्षाची शक्यता पुन्हा वाढली आहे.हात्झेरिम हवाई तळावर आयोजित इस्रायली हवाई दलाच्या दीक्षांत समारंभात बोलताना बेंजामिन नेतान्याहू यांनी राष्ट्रीय सुरक्षेबाबत देशाची भूमिका स्पष्ट केली. त्यांनी सांगितले की इस्रायली हवाई दलाचे वर्चस्व कायम राखणे हा देशाच्या संरक्षण धोरणाचा सर्वात महत्त्वाचा भाग आहे. मध्यपूर्वेत स्थैर्य आणि शांतता टिकवून ठेवण्यासाठी इस्रायली हवाई दल मजबूत असणे अत्यावश्यक असल्याचे त्यांनी अधोरेखित केले.
नेतान्याहू यांचा हा कठोर इशारा अमेरिकेचे राष्ट्राध्यक्ष डोनाल्ड ट्रम्प यांच्या त्या विधानानंतर आला आहे, ज्यामध्ये ट्रम्प यांनी बुधवारी स्पष्ट केले की इराणसोबत पाकिस्तानच्या मध्यस्थीने तयार करण्यात आलेला सहमती करार आता पूर्णपणे रद्द झाला आहे. ट्रम्प यांच्या या घोषणेमुळे दोन्ही देशांमधील वैर थांबवण्यासाठी करण्यात आलेले सर्व राजनैतिक प्रयत्न निष्फळ ठरले आहेत.
पंतप्रधान नेतान्याहू यांच्या भूमिकेला पाठिंबा देत इस्रायली संरक्षण दलाचे प्रमुख लेफ्टनंट जनरल एयाल झामिर यांनीही लष्करी तयारीबाबत महत्त्वाचे विधान केले. त्यांनी स्पष्ट केले की इराणविरोधातील लष्करी मोहीम अद्याप संपलेली नाही.झामिर यांनी सांगितले की आगामी मोहिमांसाठी नव्या लष्करी योजना आधीच तयार करण्यात आल्या आहेत. त्यांनी इशारा देत म्हटले की, येत्या काळात आपल्याला आणखी अनेक मोठ्या लष्करी कारवायांचा सामना करावा लागू शकतो.
---------------
हिंदुस्थान समाचार / Priyanka Bansode
