रायगड, 31 ऑगस्ट (हिं.स.)। कर्जत-खालापूर तालुक्यातील उद्योगांमध्ये स्थानिकांना रोजगाराचा प्राधान्याने हक्क मिळावा, या मागणीसाठी आता स्थानिकांच्या आंदोलनाची निर्णायक सुरुवात होणार आहे. सावरोली येथील टाटा स्टील आणि गोदरेज कंपनीच्या प्रवेशद्वारावर गुरुवार, ३ सप्टेंबर रोजी ‘महाएल्गार गेट बंद आंदोलन’ करण्यात येणार आहे. राष्ट्रवादी काँग्रेसचे जिल्हाध्यक्ष सुधाकर घारे यांच्या नेतृत्वाखाली होणाऱ्या या आंदोलनाला आझाद समाज पार्टी तसेच महाराष्ट्र नवनिर्माण सेनेने पाठिंबा दर्शविला आहे.

‘आमची माती, आमचा अधिकार आणि स्थानिकांनाच पहिला रोजगार’ या भूमिकेतून हे आंदोलन करण्यात येणार असून, ही लढाई कोणत्याही एका व्यक्तीची किंवा पक्षाची नसून स्थानिक तरुण-तरुणींच्या भविष्यासाठी असल्याचे आयोजकांनी स्पष्ट केले आहे.

नेरळ येथे झालेल्या बैठकीत भगवान चव्हाण यांनी स्थानिक रोजगाराच्या प्रश्नावर तीव्र नाराजी व्यक्त केली. सुधाकर घारे यांनी घेतलेल्या आंदोलनाच्या निर्णयाला आपला शंभर टक्के पाठिंबा असल्याचे त्यांनी सांगितले. स्थानिकांना रोजगार देण्याबाबत ८० टक्के स्थानिक कामगारांचा नियम असल्याचे सांगितले जाते; मात्र प्रत्यक्षात त्याची अंमलबजावणी होताना दिसत नसल्याचा आरोप त्यांनी केला.

अशोकराव भोपतराव यांनीही स्थानिकांनी आंदोलनात मोठ्या संख्येने सहभागी होण्याचे आवाहन केले. कर्जत तालुक्यात शेती आणि फार्महाऊसचे प्रमाण मोठे असले, तरी खालापूर परिसरात मोठ्या प्रमाणावर औद्योगिक प्रकल्प आहेत. त्यामुळे या उद्योगांमध्ये स्थानिकांना रोजगाराच्या संधी मिळणे आवश्यक असल्याचे त्यांनी सांगितले.

सुधाकर घारे यांनी, ‘आज आपण आवाज उठवला नाही तर भविष्यात परिस्थिती आणखी गंभीर होईल. हा कोणताही राजकीय कार्यक्रम नसून स्थानिकांच्या हक्कासाठीचा संघर्ष आहे. त्यामुळे सर्वांनी पक्षभेद विसरून एकत्र यावे,’ असे आवाहन केले.

घारे यांनी वकील सुमित साबळे यांनी आंदोलनासाठी सर्व पक्षांना कोअर कमिटीमध्ये सहभागी करून घेण्याची भूमिका मांडली. स्थानिक रोजगाराचा प्रश्न यापूर्वी कधीही झाला नाही अशा पद्धतीने निर्णायकपणे लढवून भविष्यातही असा प्रश्न निर्माण होणार नाही, यासाठी स्थानिकांना त्यांचा अधिकार मिळवून देण्याचा निर्धार यावेळी व्यक्त करण्यात आला.

३ सप्टेंबरच्या आंदोलनाकडे आता कर्जत-खालापूर परिसरातील स्थानिक तरुणांचे लक्ष लागले असून, आंदोलनाला किती प्रतिसाद मिळतो आणि कंपन्यांकडून यावर काय भूमिका घेतली जाते, याकडे सर्वांचे लक्ष आहे.

---------------

हिंदुस्थान समाचार / संदेश साळुंके (रायगड)