कोलकाता, 12 ऑक्टोबर (हिं.स.)। पश्चिम बंगालमधील दुर्गापूर येथे एका वैद्यकीय विद्यार्थिनीवर तिच्या मित्रासोबत जेवण्यासाठी बाहेर असताना बलात्कार करण्यात आला. विद्यार्थिनीचा आरोप आहे की ती जेवण्यासाठी बाहेर गेली असताना वाटेत दोन-तीन तरुणांनी तिला थांबवले, जबरदस्तीने पकडून तिच्यावर बलात्कार केला. या प्रकरणात पोलिसांनी तीन संशयितांना अटक केली आहे. या आरोपींची ओळख अद्याप उघड झालेली नाही.

ओडिशातील एमबीबीएसच्या दुसऱ्या वर्षाची विद्यार्थिनी असलेली ही विद्यार्थिनी दुर्गापूरमधील एका खाजगी वैद्यकीय महाविद्यालयात जात होती. ती तिच्या मैत्रिणीसोबत जेवण्यासाठी बाहेर गेली होती. तेव्हा तिला काही पुरूषांच्या गटाने जबरदस्तीने पकडून एका निर्जन भागात नेले आणि एका तरुणाने तिच्यावर बलात्कार केला. या घटनेनंतर, पीडितेला उपचारासाठी रुग्णालयात दाखल करण्यात आले.

उपदंडाधिकारी आणि एसडीओ दुर्गापूर रंजना रॉय यांनी पीडितेची भेट घेतली. त्या म्हणाल्या, विद्यार्थिनीची प्रकृती स्थिर आहे. तिची आई तिच्यासोबत आहे. पीडितेच्या पालकांनी मुलीच्या मित्रावर आणि त्याच्या मित्रांवर या घटनेत सहभागी असल्याचा आरोप केला आहे. पीडितेच्या मित्राला ताब्यात घेऊन चौकशी करण्यात आली आहे.

मिळालेल्या माहितीनुसार, पोलिसांनी विद्यार्थिनीच्या सामूहिक बलात्कार प्रकरणात पाच जणांची ओळख पटवली आहे. त्यापैकी तिघांना अटक करण्यात आली आहे. उर्वरित दोघे अजूनही फरार आहेत. त्यांचा शोध सुरू आहे, असे आसनसोल-दुर्गापूर पोलिस आयुक्तालयातील एका वरिष्ठ अधिकाऱ्याने सांगितले.

पोलिसांनी काय म्हटले?

एक्सवर दिलेल्या निवेदनात, पश्चिम बंगाल पोलिसांनी आरोपींवर कठोर कारवाई करण्याचे आश्वासन दिले. त्यांनी लोकांना या घटनेबद्दल असत्यापित माहिती शेअर करण्यापासून परावृत्त करण्याचे आवाहनही केले. पोलिसांनी म्हटले आहे की, दुर्गापूरमध्ये ओडिशातील एका वैद्यकीय विद्यार्थिनीवर झालेल्या लैंगिक अत्याचारामुळे आम्हाला खूप दुःख झाले आहे आणि आम्ही सर्वांना खात्री देऊ इच्छितो की दोषींना योग्यती शिक्षा होईल.

विद्यार्थिनीने तिच्यावर झालेल्या अत्याचाराबद्दल पोलिसांना सांगितले. जेव्हा तीन जणांनी माझा रस्ता अडवला तेव्हा माझा मित्र मला एकटीला सोडून पळून गेला. त्यानंतर आरोपींनी माझा फोन हिसकावून घेतला आणि मला जंगलात नेले, जिथे तिघांनीही माझ्यावर बलात्कार केला. त्यांनी मला घटनेबद्दल कोणालाही सांगितले तर गंभीर परिणाम भोगावे लागतील अशी धमकी दिली आणि माझा मोबाईल फोन परत करण्यासाठी पैसे मागितले.

पोलिसांनी सांगितले - सीसीटीव्ही फुटेज मिळवले जात आहे

पोलिसांनी सांगितले की, घटनास्थळावरील सीसीटीव्ही फुटेज मिळवले जात आहे. मेडिकल कॉलेजच्या कर्मचाऱ्यांचीही चौकशी केली जात आहे. ११ ऑक्टोबर रोजी पीडितेच्या पालकांनी दुर्गापूर न्यू टाउनशिप पोलिस ठाण्यात गुन्हा दाखल केला.

विद्यार्थिनीच्या वडिलांनी सांगितले, मी कॉलेज चांगले आहे असे ऐकले होते, म्हणून मी माझ्या मुलीला येथे वैद्यकीय शिक्षणासाठी पाठवले. तिच्यासोबत असे काही घडेल अशी मी कधीच कल्पना केली नव्हती. येथे कोणतेही सुरक्षा उपाय नाहीत.

सुवेंदू अधिकारी यांनी चिंता व्यक्त केली

वैद्यकीय विद्यार्थिनीवर झालेल्या सामूहिक बलात्कारानंतर, बंगाल विधानसभेतील विरोधी पक्षनेते सुवेंदू अधिकारी यांनी राज्यात बलात्काराच्या वाढत्या घटनांबद्दल चिंता व्यक्त केली आणि राज्य सरकारच्या भूमिकेवर प्रश्नचिन्ह उपस्थित केले. शनिवारी येथे पत्रकार परिषदेला संबोधित करताना सुवेंदू यांनी मागणी केली की बंगालमधील गुन्हेगारांना उत्तर प्रदेशातील योगी आदित्यनाथ यांच्या मॉडेलप्रमाणेच शिक्षा व्हावी. त्यांच्या शब्दांत, अशा बलात्काराच्या प्रकरणांमध्ये, आरोपींना अटक झाल्यानंतरच चकमकीत मारले पाहिजे.

बंगालला योगी आदित्यनाथसारखे सरकार हवे आहे

सुवेंदू अधिकारी यांनी बंगालला योगी आदित्यनाथसारखे सरकार हवे आहे यावर भर दिला. ते म्हणाले की, कोलकात्यातील कसबा लॉ कॉलेजमधील बलात्काराचा खटला असो किंवा दुर्गापूरमधील वैद्यकीय विद्यार्थिनीवर झालेल्या सामूहिक बलात्काराचा, राज्य सरकारने सर्व प्रकरणांमध्ये आरोपी पळून जाऊ नयेत याची काळजी घ्यावी.

ममता बॅनर्जी सरकारवर हल्लाबोल करताना भाजप नेते म्हणाले की, खाजगी महाविद्यालयांपासून ते सरकारी रुग्णालयांपर्यंत राज्यात कोणीही सुरक्षित नाही. राज्यात सतत घटना घडत आहेत. कोणीही सुरक्षित नाही. अत्यंत गंभीर प्रकरणांमध्येही गुन्हेगारांना कठोर शिक्षा होत नाही. त्यांनी आरोप केला की ममता बॅनर्जी यांचे पोलिस खंडणीखोरी करण्यात गुंतले आहेत.

---------------

हिंदुस्थान समाचार / Suraj Chaugule