रत्नागिरी, 2 ऑक्टोबर, (हिं. स.) : वन्यजीवांचे संरक्षण आणि संवर्धनाला प्रोत्साहन देण्यासाठी दरवर्षी २ ते ८ ऑक्टोबर या कालावधीत भारतीय वन्यजीव सप्ताह साजरा केला जातो. या पार्श्वभूमीवर, रत्नागिरी (चिपळूण) वन विभागामार्फत या सप्ताहात विविध प्रबोधनात्मक आणि उपक्रमशील कार्यक्रमांचे आयोजन करण्यात आले आहे.

​वन्यजीवांचे संरक्षण करण्याच्या उद्देशाने १९७२ मध्ये स्थापन झालेल्या राष्ट्रीय वन्यजीव मंडळाद्वारे हा कार्यक्रम आयोजित केला जातो. चिपळूणच्या इंदिरा गांधी सांस्कृतिक केंद्रात आज सकाळी 'संगीत बिबट आख्यान' या कार्यक्रमाने सप्ताहाचा प्रारंभ झाला.

उर्वरित कार्यक्रम असे - ​३ ऑक्टोबर : सायंकाळी ७ वा. पालकमंत्री उदय सामंत यांच्या हस्ते विभागीय वन अधिकारी, रत्नागिरी (चिपळूण) यांच्या कार्यालयाच्या आवारात नवनिर्मित फोटो गॅलरी व कॉन्फरन्स हॉलचे उद्घाटन

​४ ते ६ ऑक्टोबर : सह्याद्री संकल्प सोसायटी कार्यकारी संचालक प्रतीक शांताराम मोरे यांच्या संयुक्त विद्यमाने चिपळूण वन विभागाच्या आवारात वनजीवन विषयावर आधारित छायाचित्र प्रदर्शन

​७ ऑक्टोबर : ग्लोबल टुरिझम चिपळूण आणि चिपळूण वन विभाग यांच्या संयुक्त विद्यमाने वन्यजीव विषयावर चर्चासत्र

​२ ते ८ ऑक्टोबर : जिल्ह्यातील ५० शाळांमध्ये वन्यजीव सप्ताहाच्या निमित्ताने वनसंवर्धनाशी संबंधित प्रबोधनात्मक कार्यक्रमांचे आयोजन.

​रत्नागिरी वन विभागाने आयोजित केलेल्या या विविध कार्यक्रमांचा लाभ घेऊन वन्यजीव संवर्धनाच्या कार्यात सक्रिय सहभागी होण्याचे आवाहन विभागीय वन अधिकारी गिरीजा देसाई यांनी केले आहे.

---------------

हिंदुस्थान समाचार / रत्नागिरी