कॅनबेरा, 27 ऑक्टोबर (हिं.स.)भारतीय एकदिवसीय संघाचा उपकर्णधार श्रेयस अय्यरला सिडनी येथील रुग्णालयात दाखल करण्यात आले आहे. आणि तो सध्या आयसीयूमध्ये आहे. ऑस्ट्रेलियाविरुद्धच्या तिसऱ्या एकदिवसीय सामन्यात क्षेत्ररक्षण करताना श्रेयसला दुखापत झाली. त्याला अंतर्गत रक्तस्त्राव होत असल्याची माहिती आहे. श्रेयसच्या डाव्या बरगडीला दुखापत झाली होती ज्यामुळे तो किमान तीन आठवडे खेळू शकत नव्हता. पण आता असे दिसते की, त्याचे पुनरागमन लांबणीवर पडू शकते. सिडनी येथे तिसऱ्या एकदिवसीय सामन्यात ऑस्ट्रेलियन फलंदाज ऍलेक्स कॅरीचा झेल घेताना अय्यरला दुखापत झाली होती. ऑस्ट्रेलियन डावात ही घटना घडली जेव्हा कॅरीने हर्षित राणाच्या चेंडूवर उंच शॉट मारला. बॅकवर्ड पॉइंटवर उभे असलेले अय्यर वेगाने धावले आणि यशस्वीरित्या झेल घेतला, परंतु जमिनीवर पडल्यानंतर त्याच्या डाव्या बरगड्यांना गंभीर दुखापत झाली. त्यानंतर त्याला मैदानाबाहेर काढण्यात आले. सामन्यानंतर, भारतीय क्रिकेट नियामक मंडळाने श्रेयसच्या प्रकृतीची माहिती दिली आणि सांगितले की, त्याला रुग्णालयात नेण्यात आले आहे आणि त्याच्यावर उपचार सुरू आहेत. गेल्या काही दिवसांपासून श्रेयस आयसीयूमध्ये दाखल आहे. अहवालात अंतर्गत रक्तस्त्राव होत असल्याचे दिसून आले आहे, ज्यामुळे त्वरित दाखल करणे आवश्यक होेते. त्याच्या बरे होण्यावर अवलंबून, त्याला दोन ते सात दिवस निरीक्षणाखाली ठेवले जाईल, कारण रक्तस्त्रावामुळे संसर्गाचा प्रसार रोखण्यासाठी हे आवश्यक आहे. ड्रेसिंग रूममध्ये परतल्यानंतर टीम डॉक्टर आणि फिजिओने कोणताही धोका पत्करला नाही आणि श्रेयसला ताबडतोब रुग्णालयात नेले. त्याची प्रकृती आता स्थिर आहे. आणि तो लवकरच बरा होईल. अंतर्गत रक्तस्त्राव झाला असल्याने, त्याला बरे होण्यासाठी निःसंशयपणे अधिक वेळ लागेल आणि सध्या श्रेयसच्या स्पर्धात्मक क्रिकेटमध्ये परतण्यासाठी विशिष्ट कालावधी निश्चित करणे कठीण आहे. अय्यरला भारतात परतण्यासाठी तंदुरुस्त घोषित करण्यापूर्वी किमान एक आठवडा सिडनी रुग्णालयात राहावे लागेल. २९ ऑक्टोबरपासून ऑस्ट्रेलियाविरुद्ध पाच सामन्यांची मालिका खेळण्यासाठी भारतीय टी-२० संघात श्रेयसचा समावेश नाही. अय्यर सध्या फक्त एकदिवसीय क्रिकेटमध्ये खेळत आहे. पाठीच्या दुखापतीमुळे तो गेल्या सहा महिन्यांपासून कसोटी क्रिकेटपासून दूर आहे आणि अलीकडेच त्याला टी-२० क्रिकेटमध्ये स्थान देण्यात आलेले नाही. अय्यरने ऑस्ट्रेलियाविरुद्धच्या दुसऱ्या एकदिवसीय सामन्यात ६१ धावांची शानदार खेळी केली होती.

---------------

हिंदुस्थान समाचार / वृषाली देशपांडे