नवी मुंबई, 28 ऑक्टोबर (हिं.स.) ऑस्ट्रेलियाविरुद्ध होणाऱ्या उपांत्य फेरीच्या सामन्यापूर्वी भारतीय महिला संघाला मोठा धक्का बसला आहे. सलामीवीर प्रतीका रावल दुखापतीमुळे स्पर्धेतून बाहेर पडली आहे. तिच्या जागी शेफाली वर्माचा संघात समावेश करण्यात आला आहे. आंतरराष्ट्रीय क्रिकेट परिषदेने शेफालीच्या समावेशालाही मान्यता दिली आहे.
रविवारी नवी मुंबई येथे बांगलादेशविरुद्धच्या शेवटच्या लीग स्टेज सामन्यात झेल घेताना प्रतीकाला दुखापत झाली होती. ज्यामुळे तिला मैदान सोडावे लागले. ती ज्या पद्धतीने पडली त्यावरून स्पष्ट होते की, ती बाद फेरीच्या सामन्यांसाठी उपलब्ध राहणार नाही. हे अत्यंत दुर्दैवी आहे. ही घटना बांगलादेशच्या डावाच्या २१ व्या षटकात घडली. शर्मिन अख्तरने दीप्ती शर्माच्या गोलंदाजीवर मिडविकेटकडे शॉट मारला. रावल चेंडू थांबवण्यासाठी तिच्या डाव्या बाजूला धावली. पण तिचा पाय अचानक घसरला आणि तिचा घोटा मुरगळला. वेदनेने ओरडत रावल जमिनीवर पडली. त्यानंतर ती फिजिओच्या मदतीने मैदानाबाहेर गेली.
बांगलादेशविरुद्धच्या सामन्यात, जेव्हा प्रतीका फलंदाजीला आली नाही, तेव्हा स्मृती मानधनाने अमनजोत कौरसोबत डावाची सुरुवात केली. पावसामुळे झालेल्या सामन्यात भारताने ८.४ षटके फलंदाजी केली, ज्यामध्ये अमनजोत १५ धावांवर नाबाद राहिली. पावसामुळे सामना रद्द करण्यात आला होती.
प्रतीकाच्या जागी शेफाली वर्माला संघात स्थान देण्यात आले आहे. २१ वर्षीय या फलंदाजाचा एकदिवसीय सामन्यांमध्ये आतापर्यंत चांगली कामगिरी केली आहे. तिने २९ सामन्यांमध्ये चार अर्धशतकांसह ६४४ धावा केल्या आहेत. या फॉरमॅटमध्ये तिची सर्वोत्तम कामगिरी ७१* आहे. शेफालीने शेवटचा एकदिवसीय सामना एक वर्षापूर्वी न्यूझीलंडविरुद्ध खेळला होता. तेव्हापासून ती संघाचा भाग नव्हती. आता, ती पुन्हा एकदा मैदानात परतण्यास सज्ज आहे.
---------------
हिंदुस्थान समाचार / वृषाली देशपांडे
