इस्लामाबाद, 29 ऑक्टोबर (हिं.स.)।अफगाणिस्तान आणि पाकिस्तान यांच्यात दीर्घकाळापासून सुरू असलेला तणाव संपवण्यासाठी इस्तंबूलमध्ये झालेल्या शांतता चर्चेचा शेवट कोणत्याही ठोस तोडग्याविना झाला आहे.

पाकिस्तानचे माहिती मंत्री अत्ता उल्लाह तारड यांनी बुधवारी (दि.२९) सांगितले की दोन्ही देशांमधील ही चर्चा कोणत्याही व्यावहारिक करारापर्यंत पोहोचू शकली नाही. ही चर्चा २५ ऑक्टोबरपासून तुर्की आणि कतार यांच्या मध्यस्थीत सुरू होती. दोन्ही शेजारी देशांमधील ही बैठक १९ ऑक्टोबर रोजी दोहा येथे झालेल्या युद्धविराम करारानंतर आयोजित करण्यात आली होती. मात्र, सततच्या मतभेदांमुळे आणि आरोप-प्रत्यारोपांमुळे ही चर्चा निष्फळ ठरली.

तारड यांनी आपल्या निवेदनात सांगितले की, अफगाण प्रतिनिधीमंडळ मुख्य मुद्द्यापासून भटकले आणि चर्चेच्या मूळ उद्देशापासून दूर गेले. जबाबदारी स्वीकारण्याऐवजी अफगाण तालिबानने फक्त आरोप-प्रत्यारोप आणि कारणे देण्यात वेळ घालवला.

अहवालांनुसार, पाकिस्तानला अपेक्षा होती की तालिबानने तहरीक-ए-तालिबान पाकिस्तान (टीटीपी) वर नियंत्रण ठेवावे, कारण इस्लामाबादने अलीकडील हल्ल्यांसाठी टीटीपीला जबाबदार धरले आहे. परंतु तालिबानने टीटीपीवर नियंत्रण नसल्याचे सांगत हे नाकारले आणि म्हटले की तो गट त्यांच्या नियंत्रणाखाली नाही. माहितीनुसार, चर्चेदरम्यान दोन्ही पक्षांमध्ये वातावरण अत्यंत तणावपूर्ण होते. अफगाण पक्षाचे म्हणणे होते की ते टीटीपीच्या हालचालींवर पूर्ण नियंत्रण ठेवू शकत नाहीत, तर पाकिस्तानने अलीकडील हल्ल्यांसाठी अफगाण तालिबानलाच जबाबदार ठरवले.

या महिन्याच्या सुरुवातीला पाकिस्तानी हवाई दलाने काबुलसह अनेक भागांमध्ये टीटीपीच्या ठिकाणांवर हवाई हल्ले केले होते. त्याच्या प्रत्युत्तरात तालिबानने पाकिस्तानी सैन्याच्या चौक्यांवर हल्ले चढवले.

पाकिस्तानचे संरक्षण मंत्री ख्वाजा आसिफ यांनी शनिवारी चेतावणी दिली होती की जर इस्तंबूल चर्चेत कोणताही करार झाला नाही, तर “उघड युद्ध सुरू होऊ शकते.” मात्र युद्धविरामाची घोषणा झाल्यानंतरही सीमावर्ती भागात चकमकी सुरूच आहेत, ज्यात अलीकडेच ५ पाकिस्तानी सैनिक आणि २५ तालिबान लढवय्ये ठार झाले आहेत.

तज्ज्ञांचे मत आहे की ही निष्फळ ठरलेली चर्चा दक्षिण आशियामध्ये स्थायी शांततेच्या आशा कमी करू शकते आणि अफगाणिस्तान-पाकिस्तान यांच्यातील तणाव आणखी वाढवू शकते.

---------------

हिंदुस्थान समाचार / Priyanka Bansode