ओटावा, 29 ऑक्टोबर (हिं.स.)। कॅनडामध्ये भारतीय वंशाचे एक मोठे उद्योगपती दर्शन सिंह साहसी यांची गोळ्या झाडून हत्या करण्यात आली आहे. या हत्येची जबाबदारी लॉरेन्स बिश्नोई गँगने घेतली आहे.

कॅनडाच्या माध्यमांच्या अहवालांनुसार, भारतीय वंशाचे उद्योगपती दर्शन सिंह साहसी कॅनडातील अॅबॉट्सफोर्ड परिसरात आपल्या कारने कुठेतरी जात असताना त्यांची हत्या करण्यात आली. या हत्येचा सीसीटीव्ही फुटेजही समोर आला आहे, ज्यामध्ये दर्शन सिंह आपल्या कारमध्ये बसताना दिसतात, त्याच वेळी एक हल्लेखोर त्यांच्या जवळ येतो आणि त्यांच्यावर गोळ्या झाडतो. हल्लेखोर एकटाच होता आणि तो टोयोटा कोरोला कारमध्ये बसून घटनास्थळावरून पळून गेला.

गोळीबाराची माहिती मिळाल्यानंतर पोलीस घटनास्थळी पोहोचले, तेव्हा दर्शन सिंह गंभीर जखमी अवस्थेत होते. त्यांना तत्काळ रुग्णालयात दाखल करण्यात आले, परंतु उपचारादरम्यान त्यांचा मृत्यू झाला. कॅनडा पोलिसांनी सांगितले की तपास अद्याप प्राथमिक टप्प्यात आहे आणि लवकरच या प्रकरणाबाबत अधिक माहिती जाहीर केली जाईल.

दरम्यान, कॅनडास्थित गँगस्टर गोल्डी ढिल्लनने सोशल मीडियावर पोस्ट शेअर करून दर्शन सिंह साहसी यांच्या हत्येची जबाबदारी घेतली आहे. गोल्डी ढिल्लन लॉरेन्स बिश्नोई गँगशी संबंधित आहे.आपल्या पोस्टमध्ये गोल्डी ढिल्लनने दावा केला की पीडित ड्रग तस्करीमध्ये सामील होते आणि गँगने मागितलेल्या पैशांच्या मागणीकडे दुर्लक्ष केले जात होते.तथापि, पोलिसांनी या दाव्याची अजून पुष्टी केलेली नाही आणि दर्शन सिंह यांच्या हत्येत लॉरेन्स बिश्नोई गँगच्या कथित संलग्नतेची चौकशी सुरू असल्याचे सांगितले आहे.

---------------

हिंदुस्थान समाचार / Priyanka Bansode