सियोल, 29 ऑक्टोबर (हिं.स.)। अमेरिकेचे राष्ट्राध्यक्ष डोनाल्ड ट्रम्प बुधवारी दक्षिण कोरियात झालेल्या आशिया-प्रशांत आर्थिक सहकार्य परिषदेत सीईओ संवादात सहभागी झाले. येथे आपल्या भाषणादरम्यान त्यांनी भारतासोबतच्या व्यापार कराराचा आणि पंतप्रधान नरेंद्र मोदींचा उल्लेख केला. ट्रम्प यांनी त्या काळाचाही उल्लेख केला, जेव्हा भारत आणि पाकिस्तान यांच्यात संघर्ष सुरू होता. त्यांनी दावा केला की त्या वेळी त्यांनी भारतीय पंतप्रधानांशी चर्चा केली होती आणि त्यानंतर युद्धासारखी परिस्थिती टळली.

ट्रम्प म्हणाले, “मी भारतासोबत व्यापार करार करत आहे. माझे पंतप्रधान नरेंद्र मोदींसोबत उत्तम संबंध आहेत. मी त्यांचा खूप सन्मान करतो आणि त्यांच्याबद्दल खरी आपुलकी बाळगतो. तसेच पाकिस्तानचे पंतप्रधानही चांगले व्यक्ती आहेत. ते म्हणतात की त्यांच्या देशात एक ‘फिल्ड मार्शल’ आहेत, जे अतिशय शूर योद्धा आहेत.”

ते पुढे म्हणाले, “मी ऐकले की दोन्ही देशांमधील झटापटीत सात विमाने पाडली गेली. हे दोन्ही देश अण्वस्त्रधारी आहेत. मी पंतप्रधान मोदींना फोन केला आणि म्हटले की आम्ही तुमच्यासोबत व्यापार करार करू शकत नाही, कारण तुम्ही पाकिस्तानशी युद्धाच्या तयारीत आहात. मग मी पाकिस्तानलाही हाच संदेश दिला. दोघेही म्हणाले की आम्हाला लढू द्या, पण मी दोघांनाही समजावले.”

ट्रम्प यांनी विनोदी शैलीत पुढे म्हटले, “पंतप्रधान मोदी हे जगातील सर्वात बुद्धिमान आणि कणखर नेत्यांपैकी एक आहेत — ‘टफ अ‍ॅज हेल’. पण शेवटी, दोन दिवसांच्या आत दोन्ही देशांनी माझ्याशी संपर्क साधला आणि सांगितले की त्यांनी परिस्थिती समजून घेतली आहे, आणि संघर्ष थांबला. हे अप्रतिम नाही का?” पुढे आपल्या भाषणात ट्रम्प यांनी सध्याचे अमेरिकन राष्ट्राध्यक्ष जो बायडन यांच्यावर टीका करत म्हटले, “बायडन असे करू शकले असते का? मला तसे वाटत नाही.”

याआधी जपानमध्येही ट्रम्प यांनी भारत-पाकिस्तान संघर्ष थांबवण्याबाबत बोलले होते. त्यांनी सांगितले की दोन्ही देशांमध्ये झालेल्या झटापटीत “सात नवीन सुंदर विमाने” पाडली गेली होती. ट्रम्प म्हणाले की त्यांनी व्यापाराच्या माध्यमातून दोन्ही देशांमधील तणाव कमी करण्यास मदत केली.

ट्रम्प यांचे हे वक्तव्य अशा वेळी आले आहे, जेव्हा भारत आणि अमेरिकेमधील द्विपक्षीय व्यापार करार अंतिम टप्प्यात पोहोचला आहे. गेल्या काही महिन्यांपासून दोन्ही देशांमध्ये सुरू असलेल्या सखोल चर्चेनंतर आता कराराचा पहिला टप्पा जवळजवळ निश्चित झाला आहे. सरकारी सूत्रांच्या मते, भारत आणि अमेरिका पहिल्या टप्प्याच्या अंतिम रूपासाठी अत्यंत जवळ आले आहेत आणि आता फक्त दस्तऐवजाच्या भाषेवर सहमती होणे बाकी आहे.

---------------

हिंदुस्थान समाचार / Priyanka Bansode