दुबई, 29 ऑक्टोबर (हिं.स.)ऑस्ट्रेलिया एकदिवसीय मालिकेतील दमदार कामगिरीनंतर रोहित शर्माने आयसीसी एकदिवसीय क्रमवारीत अव्वल स्थान पटकावले आहे. त्याने एकदिवसीय कर्णधार शुभमन गिलला मागे टाकून हे स्थान मिळवले आहे. रोहित जगातील नंबर १ वनडे फलंदाज बनणारा सर्वात वयस्कर क्रिकेटपटू बनला आहे. ताज्या एकदिवसीय क्रमवारीत रोहित शर्माने शुभमन गिल आणि इब्राहिम झदरानला मागे टाकत ७८१ रेटिंग गुणांसह अव्वल स्थान पटकावले आहे. दरम्यान, शुभमन गिलची पहिल्या क्रमांकावरून तिसऱ्या क्रमांकावर घसरण झाली आहे.

रोहित शर्माने ऑस्ट्रेलिया एकदिवसीय मालिकेत इतर सर्व फलंदाजांना मागे टाकत सर्वाधिक धावा केल्या होत्या. पहिल्या सामन्यात त्याची कामगिरी खराब होती. पण त्याने दुसऱ्या एकदिवसीय सामन्यात अर्धशतक आणि शेवटच्या सामन्यात शतक झळकावले होते. रोहित शर्माने ऑस्ट्रेलियाविरुद्धच्या एकदिवसीय मालिकेत १०१ च्या सरासरीने २०२ धावा केल्या. या कामगिरीमुळे तो जागतिक एकदिवसीय क्रमवारीत पहिल्या क्रमांकावर पोहोचला आहे. रोहित शर्मा त्याच्या कारकिर्दीत पहिल्यांदाच नंबर १ फलंदाज बनला आहे.

जगातील नंबर १ वनडे फलंदाज बनून रोहित शर्माने एक विश्वविक्रम रचला आहे. तो नंबर १ स्थान मिळवणारा सर्वात वयस्कर क्रिकेटपटू ठरला आहे. रोहितने ३८ वर्षे आणि १८२ दिवसांच्या वयात एकदिवसीय सामन्यांमध्ये नंबर वनचे स्थान पटकावले आहे. रोहितने १८ वर्षांपूर्वी आंतरराष्ट्रीय क्रिकेटमध्ये पदार्पण केले आणि आता तो पहिल्यांदाच नंबर १ वर पोहोचला आहे.

रोहित शर्मा हा एकदिवसीय क्रिकेटमध्ये नंबर १ रँकिंग मिळवणारा फक्त पाचवा भारतीय फलंदाज आहे. सचिन तेंडुलकर हे स्थान मिळवणारा पहिला क्रिकेटपटू ठरला होता. धोनीने त्याच्या पाठोपाठ एक पाऊल पुढे टाकले. विराट कोहलीने बराच काळ हे स्थान राखले. शुभमन गिलने खूप कमी वेळात नंबर १ वनडे रँकिंग मिळवले आणि आता रोहित शर्मा अव्वल स्थानी विराजमान झाला आहे.

रोहित शर्माची एकदिवसीय कारकीर्द उल्लेखनीय आहे. त्याने आतापर्यंत २७६ एकदिवसीय सामन्यांमध्ये ११,३७० धावा केल्या आहेत. रोहितची सरासरी ४९.२२ आहे आणि त्याने ३३ शतके आणि ५९ अर्धशतके झळकावली आहेत.

---------------

हिंदुस्थान समाचार / वृषाली देशपांडे