कॅनबेरा, 30 ऑक्टोबर (हिं.स.) ऑस्ट्रेलियातील मेलबर्न येथून दुःखद बातमी समोर आली आहे. १७ वर्षीय प्रतिभावान क्रिकेटपटू बेन ऑस्टिनचा अपघातात मृत्यू झाला आहे. बेन आपल्या क्लबच्या नेटवर ऑटोमॅटिक बॉलिंग मशीनसमोर फलंदाजीचा सराव करत होता. त्याने हेल्मेट घातले होते. पण चेंडू त्याच्या डोक्यावर आणि मानेवर आदळला. अपघातानंतर त्याला गंभीर अवस्थेत तातडीने रुग्णालयात नेण्यात आले. जिथे त्याचे निधन झाले.

फर्न्ट्री गली क्रिकेट क्लबने एका अधिकृत निवेदनात म्हटले आहे की, बेनच्या निधनाने आम्हाला धक्का बसला आहे. त्याचे नुकसान आपल्या संपूर्ण क्रिकेट जगताला तीव्रतेने जाणवेल. क्लबने बेनचे वर्णन एक स्टार क्रिकेटपटू, एक हुशार नेता आणि एक अद्भुत माणूस असे केले आहे. तो संघासाठी एक आशादायक गोलंदाज आणि फलंदाज होता. ज्याला भविष्यासाठी मोठ्या अपेक्षा होत्या.

बेनच्या निधनाने पुन्हा एकदा क्रिकेट जगताला फिलिप ह्यूजेसच्या दुःखद मृत्यूची आठवण करून दिली आहे. २०१४ मध्ये घरगुती शेफील्ड शिल्ड सामन्यादरम्यान ह्यूजेसच्या मानेला चेंडू लागला आणि त्यामुळे त्याचा मृत्यू झाला होता. त्या घटनेनंतर, क्रिकेट ऑस्ट्रेलियाने सुरक्षा नियम कडक केले होते.

ऑस्टिन घटनेने पुन्हा एकदा मैदानावरील सुरक्षेवर प्रश्न उपस्थित झाले आहेत. क्लबने म्हटले आहे की, बेन ऑस्टिनला एक प्रतिभावान आणि उत्साही तरुण क्रिकेटपटू म्हणून क्रिकेट जगतात नेहमीच लक्षात ठेवले जाईल.

---------------

हिंदुस्थान समाचार / वृषाली देशपांडे