नवी दिल्ली, 30 ऑक्टोबर, (हिं.स.)इंडियन प्रीमियर लीगचा पुढचा हंगाम अजून खूप दूर आहे.पण संघांनी आधीच तयारी सुरू केली आहे. पुढच्या महिन्यात, नोव्हेंबरमध्ये, सर्व दहा संघांना हे जाहीर करावे लागेल की, ते कोणते क्रिकेटपटू कायम ठेवणार आहेत आणि कोणते सोडून देणार आहेत. जेणेकरून बीसीसीआय पुढील लिलावाची तयारी करू शकेल. यादरम्यानच कोलकाता नाईट रायडर्सच्या संघाने अभिषेक नायर यांची मुख्य प्रशिक्षकपदी निवड केली आहे.

अभिषेक नायर आयपीएल संघ केकेआरचे नवे मुख्य प्रशिक्षक असतील. यापूर्वी चंद्रकांत पंडित यांनी हे पद भूषवले होते. पण हे अभिषेक नायर यांचे केकेआरमध्ये पुनरागमन आहे. त्यांनी यापूर्वी त्याच संघासाठी सहाय्यक प्रशिक्षक म्हणून काम केले होते. यापूर्वी, अभिषेक नायर यांनी महिला प्रीमियर लीगमध्ये यूपी वॉरियर्सचे मुख्य प्रशिक्षक म्हणून काम पाहिले होते.

तीन वर्षे संघासोबत असलेले चंद्रकांत पंडित संघातून बाहेर पडले आहेत. त्यांच्या मार्गदर्शनाखाली केकेआरने २०२४ मध्ये आयपीएलचे विजेतेपद पटकावले होते. संघाने जवळजवळ दहा वर्षांनी यशस्वीरित्या आयपीएल ट्रॉफी जिंकली होती. पण मागील हंगाम संघासाठी निराशाजनक होता. अजिंक्य रहाणेच्या नेतृत्वाखाली पॉइंट्स टेबलमध्ये संघ आठव्या स्थानावर राहिला होता.

भारतीय संघासाठी तीन एकदिवसीय सामने खेळणारा अभिषेक नायर यांनी यापूर्वी अनेक संघांना प्रशिक्षक म्हणून काम पाहिले आहे. ते यापूर्वी कोलकाता नाईट रायडर्सशी कोणत्या ना कोणत्या भूमिकेत जोडले गेले आहेत. त्यांनी काही काळासाठी टीम इंडियाचे सहाय्यक प्रशिक्षक म्हणूनही काम केले होते. आता, नायर यांच्याकडे केकेआर संघाची पुनर्बांधणी करण्याचे काम सोपवले जाणार आहे.

पुढील महिन्यात, नोव्हेंबरमध्ये कोणते क्रिकेटपटू कायम ठेवण्यात आले आहेत आणि कोणते सोडून देण्यात आले आहेत हे उघड होईल. त्यामुळे, येणारे दिवस खूप मनोरंजक असतील. त्याच्या नियुक्तीनंतर लगेचच, अभिषेकला कोणत्या क्रिकेटपटूंना कायम ठेवायचे आहे हे ठरवावे लागणार आहे.

---------------

हिंदुस्थान समाचार / वृषाली देशपांडे